Акупанты ўцякаюць з Херсона ў Крым праз Арабатскую стрэлку

Расейскія дэзерціры перамяшчаюцца выключна ўночы, а ўдзень хаваюцца.

Расейскія захопнікі спрабуюць тэрмінова пакінуць асобныя раёны Херсона. Магчыма, асцерагаючыся рашучага і няўхільнага наступу УСУ.

Пра гэта паведамляе Галоўная ўправа выведкі Міністэрства абароны Украіны.

Як распавялі ўкраінскія выведчыкі, акупанты спрабуюць схавацца з месца баявых дзеянняў у Крым праз Арабатскую стрэлку.

Выведчыкі расказалі, што ў акупаванай Калінаўцы Херсонскай вобласці з'явілася група дэзерціраў 18 - 20 гадоў. Апрануты ў вайсковай форме расейскага ўзору, без знакаў адрознення і галаўных убораў. Просяць ежу і ваду ў мясцовага насельніцтва.

«Адзін з іх, магчыма, паранены. Пры сабе маюць 3 аўтаматы. Рухаюцца ў бок Крыма. Пры гэтым перасоўваюцца выключна ўначы, а днём хаваюцца», - сказалі ўкраінскія выведчыкі.

У Херсонскай вобласці фіксуюцца нярэдкія выпадкі дэзерцірства расейскіх вайскоўцаў. Галоўная прычына ўцёкаў - вялікія страты акупантаў праз дакладныя ўдары ўкраінскай артылерыі. Часцей за ўсё ўцекачы спрабуюць дабрацца да Крыма праз Арабатскую стрэлку. Гэты маршрут бяспечны і добра адпрацаваны.