«Пасля 24 лютага мы не бачылі Samsung, Apple, Electrolux»

Топ-мэнэджар аднаго з самых буйных інтэрнет-гіпермаркетаў Беларусі расказаў аб дзеянні санкцый.

Праз санкцыі супраць Беларусі і Расеі асартымент аднаго з самых буйных інтэрнэт-гіпермаркетаў у нашай краіне — 21vek.by — скараціўся да 85% ад планавага. Пра гэта «Зеркалу» заявіў CEO гэтай кампаніі Сяргей Вайніловіч. Ён таксама расказаў, што «айфоны пакуль ёсць, але сталі яшчэ даражэйшымі». На прагноз топ-мэнэджара інтэрнэт-гіпермаркета, кошт айфонаў найбліжэйшым часам наўрад ці будзе расці, ён «і так касмічны». Сяргей Вайніловіч таксама выказаўся пра патэнцыяльны ўвоз тавараў у Беларусь па паралельным імпарце.

- У сувязі з тым, што многія брэнды заявілі, што яны не будуць пастаўляць свае тавары ў Расею і Беларусь, пасля 24 лютага мы не бачылі Samsung, Apple, Electrolux і іншых брэндаў, - паведаміў Сяргей Вайніловіч на дыскусіі з прадстаўнікамі маркетплейсаў.

Са слоў Вайніловіча, праз санкцыі асартымент інтэрнэт-гіпермаркета 21vek.by цяпер скараціўся да 85% ад планавага. Аднак, ёсць тэхнічная і юрыдычная магчымасць завозіць тавары па паралельным імпарце. Але кампанія пакуль не атрымлівала прапаноў, каб тавар даставілі хутка і актуальнымі коштамі.

- Айфоны пакуль ёсць - сталі яшчэ даражэйшымі. Яшчэ даражэйшымі ўжо не будуць - кошт і так касмічны.

Даведка «Зеркала». Раней ва ўрадзе заявілі, што жадаюць легалізаваць паралельны імпарт. Гэта тлумачылі імкненнем не дапусціць «дэфіцыту тавараў імпартнай вытворчасці і насычэння спажывецкага рынку».

Паралельны імпарт прадугледжвае ўвоз у краіну арыгінальных тавараў і паслуг без дазволу вытворцы або ўладальніка інтэлектуальнай уласнасці. Гэта значыць, тавар трапляе ў краіну не праз афіцыйнага дылера ці ўпаўнаважанага на гэта імпарцёра, а праз кампанію, якая працуе раўналежна з імі. Адсюль і назва. Такі імпарт яшчэ называюць шэрым.

Пры гэтым такія тавары - гэта не кантрабанда або падробка. Калі вы купляеце ўвезены такім спосабам тэлефон Samsung, то гэта будзе менавіта ён, толькі ўвезены ў Беларусь не афіцыйным пастаўшчыком. Больш за тое, хутчэй за ўсё, прашыўка гэтага тэлефона будзе для іншага рынку, напрыклад, турэцкага ці казахстанскага.

Сяргей Вайніловіч патлумачыў, што некаторыя кампаніі мелі лакальныя прайсы ў расейскіх рублях, а ў сакавіку, калі курс расейскага рубля да даляра перавышаў 100 рублёў, фірмы пералічылі тавар па 110 рублёў - «улічваючы дэфіцыт, прайсы ніхто не апусціў». Сёння, калі даляр стаў каштаваць 52-53 расейскія рублі, атрымліваецца, што тавары падаражэлі ў 2-2,5 разы. Дадаткова да гэтага, некаторыя кампаніі, якія не спынялі пастаўкі імпарту ў РБ паднялі свае кошты на 30-50%, «гэта не прывяло да павелічэння попыту».

Сёння ў 21vek.by павялічыўся попыт на тавары расейскай і беларускай вытворчасці. Напрыклад, попыт на прадукцыю «Атлант» вырас. «Завод працуе на поўную магутнасць, тавараў бракуе, але пры гэтым яны ёсць», - удакладніў Сяргей Вайніловіч.

Але заўважылі і падзенне пакупніцкага попыту. Да прыкладу, быў цяжкі сезон з шынамі - у людзей не было грошай, заказаў стала менш на 15-20%. Тым не менш бізнэсовец мяркуе, што ў онлайн-гандлю вялікі патэнцыял. Паводле ягоных звестак, у Беларусі ў раздробным абарачэнні онлайн-гандаль займае ўсяго толькі 5—5,5%, у Расеі — 10%. У планах кампаніі цягам трох гадоў павялічыць онлайн-гандаль як мінімум да расейскіх маштабаў.

- Цяпер час не сістэмнага бізнэсу, больш спекулятыўнага, транзакцыйнага. Дазволілі вазіць праз мяжу тавары, даражэйшыя за 200 еўраў, і зноў паехалі перакупы. Адбываецца кансалідацыя гульцоў, некаторыя заканчваюць свой «выступ». Мы разлічваем, забраць іх абарачэнне сабе.