Праз санкцыі аэрапорт «Мінск» перайшоў на чатырохдзённы працоўны графік
17- 1.07.2022, 15:03
- 18,866
Беларуская авіяцыя мае цяжкасці з пастаўкамі абсталявання.
Праз санкцыі персанал Нацыянальнага аэрапорта «Мінск» быў вымушаны перайсці на чатырохдзённы працоўны тыдзень. Пра гэта расказаў гендырэктар аэрапорта Вячаслаў Харанэка.
Ён кажа, што беларуская авіяцыя мае цяжкасці з пастаўкамі новага тэхналагічнага абсталявання і абслугоўваннем ужо існага. Ёсць пытанні і з замежным праграмным забеспячэннем.
Альтэрнатыву пачалі шукаць з пачатку 2022 года. «У частцы імпартазамяшчэння вядзецца актыўная работа з беларускімі вытворцамі. Напрыклад, вядзем перамовы з айчынным вытворцам хімрэагентаў, акумулятарных батарэй, асвятляльных прыбораў і гэтак далей», — падзяліўся падрабязнасцямі Харанэка.
Пераход на чатырохдзённы працоўны тыдзень і просты для зменнага персаналу гендырэктар патлумачыў эканамічнай сітуацыяй.
Беларускія самалёты страцілі магчымасць лятаць у аэрапорты ЕЗ і пралятаць над тэрыторыяй Еўразвязу пасля інцыдэнту з самалётам кампаніі RyanAir. Таксама еўрапейскія вознікі сталі аблятаць паветраную прастору Беларусі. У дадатак кампанія «Белавія» была вымушаная вярнуць некаторыя свае самалёты лізінгавым кампаніям і скараціць флот да 15 самалётаў.