Пад Кобрынам у выніку аварыі аўтамабіль павіс на дрэве
27- 1.07.2022, 17:23
- 11,258
22-гадовая аўталэдзі не справілася з кіраваннем.
Афіцыйная прадстаўніца УУС Берасцейскага аблвыканкама Наталля Мілюкова расказала, што ў Кобрынскім раёне кіроўца не справілася з кіраваннем і наехала на прыдарожныя дрэвы, піша БелТА.
Інцыдэнт адбыўся 1 ліпеня ў зоне адпачынку ля возера Каташы. Паведамляецца, што аўтамабіль «Міцубісі», за стырном якога знаходзілася 22-гадовая дзяўчына, накіроўваўся ў бок аднайменнай вёскі.
- Кіроўца не выбрала бяспечную хуткасць руху, праз што не справілася з кіраваннем. Легкавушка з'ехала ў правы па ходзе руху кювет і наехала на прыдарожныя дрэвы, даслоўна павіснуўшы на адным з іх, - удакладніла прадстаўніца службы.
З яе слоў, кіроўца не пацярпела. Апроч яе ў аўто нікога не было. Адзначаецца, што аўтамабіль у выніку здарэння атрымаў сур'ёзныя механічныя пашкоджанні.