СБУ нейтралізавала ў Кіеве закансерваваную агентуру Расеі
6- 1.07.2022, 17:52
- 11,284
Групу сфармаваў кадравы супрацоўнік ГРУ.
Служба бяспекі Украіны паведамляе, што ў выніку шматэтапнай спецаперацыі яна нейтралізавала агентурную групу ГРУ ў Кіеве.
СБУ заявіла, што затрымала чацвярых расейскіх агентаў, якія праводзілі выведку пазіцый УСУ і стратэгічных аб'ектаў і вялі прапаганду ў падтрымку акупантаў.
Служба сцвярджае, што групу сфармаваў кадравы супрацоўнік ГРУ палкоўнік Уладзіслаў Данец, а непасрэднае кіраўніцтва групай ажыццяўляў супрацоўнік так званай «МДБ ЛНР» Валянцін Цілілім.
Паводле інфармацыі следства, група з моманту стварэння была «закансерваваная», але актывізавалася пасля пачатку расейскага ўварвання.
Цяпер затрыманым афармляюць падазрэнні паводле артыкула аб дзяржаўнай здрадзе ва ўмовах ваеннага становішча, будзе разглядацца пытанне аб абранні для кожнага з іх меры стрымання.