Лукашысты актыўна ўзяліся параўноўваць даходы і выдаткі беларусаў

Раней для людзей, «якія жывуць не адпаведна сродкам» паднялі падаткі.

За пяць месяцаў гэтага года - са студзеня да траўня - падаткавікі праверылі выдаткі і даходы 3 999 чалавек, паведамляе zerkalo.io са спасылкай на МПЗ. У 37% правераных знайшлі перавышэнне выдаткаў над грашовымі паступленнямі. Ім налічылі да выплаты 6,1 млн. рублёў. Пры гэтым у сярэднім аднаму чалавек налічылі да выплаты 4 тысячы 78 рублёў падаходнага падатку.

Нагадаем, з гэтага года ў Беларусі паднялі падаходны падатак для тых, хто жыве не адпаведна сродкам, і ўвялі новаўвядзенні ў дэкларацыях.

Так, з 1 студзеня чыноўнікі адмовіліся ад абавязковага запыту дэкларацыі аб даходах і маёмасці. Раней падаткавікі запытвалі такую інфармацыю ва ўсіх, у каго правяралі выдаткі і прыбыткі. Яны разлічваюць, што гэта скароціць тэрміны праверак. Таксама павялічылі ўдвая суму перавышэння выдаткаў над даходамі, пры якой падаткавікі запытваюць тлумачэнні, дзе чалавек узяў "лішнія" грошы. Яе паднялі да 500 базавых адзінак (цяпер гэта 16 тысяч рублёў).

Таксама ўлады павялічылі падаходны падатак з сумы перавышэння выдаткаў над даходамі да 20% (раней ён складаў 16%).