Экс-палітвязень і бізнэсовец Аляксандр Васілевіч з'ехаў з Беларусі
3- 1.07.2022, 19:30
- 8,838
Пяць месяцаў таму ён выйшаў на волю з СІЗА.
Аляксандр Васілевіч, суўладальнік рэкламнага агенцтва Vondel/Hepta і прасторы "Галерэя Ў", сузаснавальнік выданняў Kyky.org і The Village Беларусь, пакінуў Беларусь праз 5 месяцаў пасля таго, як выйшаў на волю з СІЗА. Аб гэтым ён паведаміў у Facebook, піша zerkalo.io.
- Нечакана скончыліся суды! Абвінавачаны, асуджаны, але адседзеў і - вольны! Да сям'і даехаў, дзеці заабдымалі, у моры выкупаны. Усім сябрам і знаёмым, і незнаёмым, якія дапамагалі і перажывалі - дзякую, без вас я б здох. Тыя, хто запрашаў у госці ў розных краінах, - так я прыеду, - напісаў бізнэсовец.
Нагадаем, Васілевіча затрымалі 28 ліпеня 2020 года, калі ён паспрабаваў падаць дакументы для паруучыцельства за Віктара Бабарыка. Ён атрымаў 14 дзён арышту, а пазней яму выставілі абвінавачанні ва "ўхіленні ад выплаты падаткаў у вялікай суме".
Праваабаронцы прызналі яго палітвязнем.
4 лютага 2022 года суд абвясціў бізнэсоўца вінаватым і прысудзіў тры гады калоніі агульнага рэжыму. Яго вызвалілі ў зале суда ў сувязі са сканчэннем тэрміну прыцягнення да адказнасці.
У СІЗА Васілевіч правёў 1 год, 5 месяцаў і 8 дзён.