Reuters: ЗША паспяхова выпрабавалі гіпергукавую ракету

Выпрабаванні прайшлі 12 ліпеня.

Паветраныя сілы ЗША паспяхова выпрабавалі гіпергукавую ракету кампаніі Lockheed Martin Corp 12 ліпеня.

Пра гэта паведамляе Reuters.

Крыніцы выдання паведамілі, што выпрабаванні прайшлі на фоне росту занепакоенасці наконт таго, што Расея і Кітай дасягнулі вялікіх поспехаў у распрацоўцы ўласнай гіпергукавой зброі.

Адзначаецца, што ў аўторак ля ўзбярэжжа Каліфорніі вайскоўцы паспяхова выпрабавалі ракету-носьбіт паветранай зброі хуткага рэагавання (ARRW).

ARRW паднімаецца ўверх пад крылом самалёта перад тым, як ён будзе запушчаны да цэлі. Гіпергукавая зброя рухаецца ў верхніх пластах атмасферы з хуткасцю, якая ў пяць разоў перавышае хуткасць гуку, або прыкладна 6 200 км на гадзіну.

Падрадчыкі абароннага ведамства спадзяюцца атрымаць выгаду ад пераходу да гіпергукавой зброі не толькі шляхам яе стварэння, але і шляхам распрацоўкі новых механізмаў выяўлення і знішчэння.

Паспяховыя выпрабаванні сведчаць аб прагрэсе ЗША ў распрацоўцы гіпергукавой зброі, хоць раней бывалі і няўдалыя выпрабаванні, а таксама расла асцярога, што Злучаныя Штаты адстаюць у гонцы ўзбраенняў.