«Ты хацеў СССР, Ваня? Ну, вось ён, прыгледзься»
35- 2.07.2022, 18:28
- 43,978
У Санкт-Пецярбургу адбыўся гучны скандал з аблавай на вядомага хакеіста і ягонай дастаўкай у ваенкамат.
Напярэдадні быў затрыманы крымінальным вышукам і дастаўлены ў ваенкамат 25-гадовы брамнік зборнай Расеі ў хакеі хакеіст Іван Фядотаў, «найлепшы галкіпер КХЛ», уладальнік прэстыжных спартовых узнагародаў. На яго ўчынілі цэлую аблаву, у якой удзельнічалі дзясяткі сілавікоў. Спартоўца падазраюць ва ўхіленні ад войска, што пагражае яму двума гадамі пазбаўлення волі.
У ваенкамаце Фядотаву стала дрэнна, і ў ноч з 1 на 2 ліпеня яго забралі адтуль на хуткай, паведамляе Activatica.
– Пэўна, здзівіўся. Пры тым, што сам нядаўна выходзіў гуляць супраць фінаў у майцы з надпісам «СССР», – каментуе сітуацыю публіцыст Віктар Шандаровіч. – Проста ён думаў, што горш ад гэтай здані мінулага будзе чамусьці менавіта фінам. Або нічога не думаў, а проста надзеў, што далі. А яно вунь як атрымалася.
Ты хацеў СССР, Ваня? Ну вось ён. Прыгледзься.
Ён, мусіць, добры хлопец, гэты Іван Фядотаў. Ён малады і не памятае ніякага часу, акрамя пуцінскага. Ён яму, мусіць, падабаўся да нядаўняга часу. Цяпер, мусіць, перастаў падабацца ненадоўга...
Вядома, ненадоўга!
Адпусцяць яго. Ён жа не Кара-Мурза, не Навальны. Хто-небудзь куды-небудзь патэлефануе (хоць той самы дэпутат Фяцісаў, які адкінуў калісьці канькі ў тым жа ЦСКА – і ціха зліняў у суседні з Філадэльфіяй штат у часы, калі воля толькі пачыналася, а не сканчалася). Патэлефануе – і вырвецца Фядотаў на волю, і як страшны сон будзе ўспамінаць перспектыву асабіста і бясплатна паваяваць з Украінай.
Ды і якая ад яго карысць на фронце, ён і ў танк не ўлезе са сваімі габарытамі, і патрапіць у гэтыя 202 см можна з любой адлегласці, толькі ўжо не шайбай.
Няхай ужо ляціць, я думаю, не будзем настойваць на прынцыповасці, а будзем спадзявацца на карупцыю. Няхай армейская братва дамовіцца паміж сабой паводле паняткаў і адаб'е гэтае лядовае пабоішча ад святога абавязку...
Але вось маечку з надпісам «СССР», Ваня, апранаць усё ж не варта. На сабе не паказвай, як кажуць.