Памёр ураджэнец Менска, стваральнік Чабурашкі Леанід Шварцман
- 2.07.2022, 16:15
- 6,442
Ён меў 101 год.
Леанід Шварцман нарадзіўся 30 жніўня 1920 года ў Менску на вуліцы Ракаўскай, у сям'і размаўлялі на ідыш. Скончыў мастацкую школу ў Менску, піша nashaniva.com.
“Потым у Ленінград пераехаў, дзе вучыўся ў школе Акадэміі мастацтваў, а каб выжыць, уладкаваўся на Кіраўскі завод. У час блакады там працаваў токарам. У 1941-м нас эвакуавалі ў Чэлябінск. Токарам працаваў усю вайну», — расказваў пра сябе Леанід Шварцман.
Пасля вайны паступіў ва УДІК, працаваў на студыі "Саюзмультфільм".
Шмат якія анімацыйныя фільмы, створаныя пры ягоным удзеле, сталі класічнымі. Сярод іх — «Снежная каралева», «Залатая антылопа», «Кракадзіл Гена», «Кацяня на імя Гаў», «38 папугаяў», «Пунсовая кветачка».
Менавіта Леанід Шварцман стварыў выяву Чабурашкі ды іншых герояў стужкі, а таксама прамаляваў экстэр'еры ў ім.
Калі прыгледзецца, то дамкі ў «Кракадзілу Гену» нагадаюць Нямігу, Высокае места і Ракаўскае прадмесце.
«Я не думаў пра Менск, калі маляваў фільмы і будынкі, на фоне якіх адбываюцца прыгоды Чабурашкі ды Кракадзіла Гены, — пісаў мастак. - Менск з'явіўся ў мультфільмах сам, з уласнай волі, з маёй памяці».
Шварцман таксама напісаў серыю карцін: “Стары Менск. Успаміны дзяцінства».