Беларус вылавіў на Прыпяці сома ў чалавечы рост

Фотафакт.

Чацвер выдаўся ўдалым для сям'і рыбакоў на Прыпяці ў Пінску. Бацька і сын вылавілі ў палескай рацэ вялізнага сома ў чалавечы рост, якога не змаглі нават поўнасцю ўзважыць. Пра гэта малодшы з рыбакоў расказаў у сацсетках.

Са слоў маладзёна, сома злавілі апоўдні. Рыбалілі з лодкі на спінінг. Трапілася рыба на блешню.

«Прыкладна 40 хвілін бацька цягнуў. Сом гэты час павадзіў яго па ямах, часам бацька думаў, што рыба пераверне лодку, і былі думкі ўжо адрэзаць кошык», - распавёў хлопец.

Але ўсё ж рыбак у гэтым баі перамог. Сома выцягнулі.

«Пад рукой быў бязмен да 25 кг, не ставала яго магутнасці для вымярэння вагі гэтага сома - зашкальвала стрэлка. Але з адчуванняў, бацька сказаў, што сом важыць мінімум трыццатку», - кажа паляшук.

Са слоў хлопца, сома ў выніку аддалі бабулі - яна лепш ведае, як з ім абысціся.