Колькі каштуюць у Менску кветкі да 1 верасня
10- 31.08.2022, 21:07
- 4,648
І дзе танней?
Трыццаць першага жніўня - гарачая пара ў гандляроў кветкамі: усім тэрмінова трэба купіць букет у школу на 1 верасня. А колькі каштуюць кветкі для настаўнікаў бацькам сёлета? Менскія журналісты прайшліся па кветкавых крамах, кіёсках і прылаўках і запісалі кошты.
CityDog пабываў на Камароўцы, тамака можна купіць і непатрабавальныя, і суздром сімпатычныя букеты. У намётах простыя букеты хрызантэм ёсць па 15 рублёў, кветкі ў гаршчках у падарункавай «торбе» - па 20-22 рублі.
На шэрагах, дзе гандлююць вырашчаным на сваіх падворках, можна купіць букецікі за 15 рублёў і гладыёлусы - да 20 рублёў.
У рыначных кветкавых шапіках букеты стартуюць ад 20 рублёў. Ружы каштуюць па 3-6 рублёў у залежнасці ад вышыні, галінка кустовай ружы - блізу 7 рублёў, гваздзікі - па 3 рублі, архідэі - ад 30-ці.
На кветкавых шэрагах у метро «Інстытут культуры» кошты наступныя: ружы па 4-7 рублёў, галінка кустовай ружы - 6 рублёў, хрызантэмы - 6.50-7 рублёў. Букеты ад дваццаткі. Яшчэ ёсць кветкі ў плеценых кошыках — каштуюць блізу 60 рублёў.
Вышэй за ўсё кошты чакана ў пераходах метро: кошты на ружы дасягаюць 8 рублёў, на хрызантэмы - 9 рублёў, на букеты пачынаюцца ад 35 рублёў.
Супрацоўнікі дзяржагенцтва «Мінск-Навіны» пабывалі ў іншым папулярным месцы - пераходах ля чыгуначнага вакзала. Хаця кветкавых павільёнаў там шмат, 31 жніўня пакупнікі стаялі ў вялікіх чэргах, чакалі па 20 хвілін і больш.
Часткова гэта тлумачыцца коштамі. У чыгуначных кіёсках, мяркуючы з прайс-ліста на ўваходзе, ружы каштуюць 60 капеек за 30-сантыметровую кветку, 40 см - 1.30 рубля, 50 см - 2 рублі, 80 см - 2.90 рубля. Хрызантэмы - блізу 8 рублёў.
Ёсць шмат простых і невялікіх гатовых букетаў у папяровай абгортцы па 20-30 рублёў. Складаныя букеты могуць абысціся і на 60-70 рублёў. Кветкі ў «торбачцы» - па 25-30, а ў драўлянай скрыначцы - больш за 50 рублёў.