УСУ знішчылі дзясятак расейскіх «Метэарытаў»

Ваяры расказалі, што ўяўляе з сябе гэтая тэхніка.

Украінскія вайскоўцы распавялі, што ўяўляе сабой расейскі «Метэарыт», нядаўна знішчаны ў Харкаўскай вобласці. Усяго з пачатку вайны УСУ знішчылі больш за дзясятак аналагічных машын ворага.

Пра гэта паведамляе «РБК-Україна» са спасылкай на АК «Поўдзень».

Што гэта за тэхніка?

УР-77 «Метэарыт», таксама вядомая ў Расеі як «Змей Гарыныч», гэта даволі старая савецкая ўстаноўка размінавання. Яна была распрацаваная і выраблялася на Харкаўскім трактарным заводзе яшчэ ў другой палове 1970-х гадоў. Машына ўяўляе сабой базавае шасі ад САУ 2С1 «Гваздзік», на якую ўсталявалі вежавую пускавую ўстаноўку для дзвюх ракет, адсекі для дэтанацыйнага кабелю і пульт кіравання.

Асноўнае прызначэнне УР-77 - стварэнне праходаў у супрацьтанкавых мінных палях шырынёй ад 6 да 14 метраў шляхам стварэння магутнай ударнай хвалі, якая ўплывае на дэтанатары мін. Для гэтага выкарыстоўваюцца спецзарады даўжынёй блізу 90 метраў, якія нагадваюць пажарныя рукавы.

Зарад УЗП-77

Спецыяльныя зарады запоўненыя некалькімі сотнямі кілаграмаў пластычнай узрыўчаткі, праз якую праходзіць дэтанацыйны кабель. «Дастаўка» зарадаў на міннае поле ажыццяўляецца з дапамогай спецыяльных парахавых ракет. «Закідаецца» зарад на адлегласць ад 200 да 500 метраў у залежнасці ад яго тыпу. На канчатковым этапе палёту ракеты адлучаюцца, а на дэтанацыйны кабель падаецца электраімпульс выбуху. Пры выбуху адбываецца падрыў мін, адкідванне іх ад месца выбуху ці іх разбурэнне.

Зрэшты, у рэальных баявых абставінах яна рэдка выкарыстоўваецца такім чынам. Выбух зарада не дае 100% гарантыі, што мясцовасць размінаваная. Напрыклад, могуць ацалець міны, якія маюць узрывальнікі двухразовага націску або супрацьпяхотныя міны нацяжнога дзеяння. Таксама на выбуховую хвалю не рэагуюць магнітныя і інфрачырвоныя ўзрывальнікі мін. Менавіта таму тыя ж расейцы часцей выкарыстоўваюць УР-77 для абстрэлаў аб'ектаў цывільнай інфраструктуры ўкраінскіх гарадоў.