СБУ паведаміла аб падазрэнні ў дзяржздрадзе высокапастаўленаму выведніку

Ён перадаваў інфармацыю РФ.

СБУ паведаміла аб падазрэнні былому намесніку кіраўніка Галоўнай управы выведкі Украіны, генерал-маёр падазраецца ў дзяржаўнай здрадзе, а таксама ў замаху на жыццё работніка праваахоўнага органа і незаконным захоўванні зброі.

Пра гэта паведамілі ў прэс-службе ўкраінскай службы.

Паводле інфармацыі следства, ён перадаваў расейскім спецслужбам таемную і цалкам таемную інфармацыю аб актуальнай вайскова-палітычнай сітуацыі ва Украіне. Акрамя гэтага, перапраўляў акупантам закрытыя звесткі аб мерапрыемствах, якія праводзяцца УСУ і іншымі падраздзяленнямі ўкраінскіх Сіл абароны для адбіцця ўзброенай агрэсіі.

У СБУ заявілі, што затрымалі падазраванага ў пачатку поўнамаштабнага ўварвання РФ. Падчас вобыску па месцы працы ён спрабаваў застрэліць прадстаўнікоў следча-аператыўнай групы Службы бяспекі, якія прыбылі для правядзення працэсуальных дзеянняў.

«Былы высокапастаўлены чыноўнік ужыў супраць праваахоўнікаў баявы пісталет Макарава», - гаворыцца ў паведамленні.

У СБУ распавялі, што затрыманы быў намеснікам старшыні ГУР МАУ ў 2008-2010 гады. Потым працаваў на розных пасадах дзяржаўнай службы гэтай установы, а таксама ў шэрагах кіроўнага складу Дзяржаўнага касмічнага агенцтва Украіны.

Паводле інфармацыі службы, у поле зроку расейскіх спецслужбаў ён трапіў праз свае пракрамлёўскія погляды, якія былі сфармаваныя падчас навучання ў часы СССР у Маскоўскай вышэйшай агульнавайсковай каманднай вучэльні і акадэміі ім. Фрунзэ.

«На заданне акупантаў, ён збіраў сакрэтную інфармацыю, якая цыркулюе ў Мінабароны, у тым ліку Галоўнай управе выведкі, а таксама ў Нацыянальнай акадэміі Наземных войскаў імя Сагайдачнага», — гаворыцца ў паведамленні.

У СБУ заявілі, што краіну-агрэсара цікавілі звесткі выведвальнікаў аб дзейнасці стратэгічна важных аб'ектаў вайскова-прамысловага комплексу Украіны.

Са слоў выканаўцы абавязкаў кіраўніка СБУ Васіля Малюка, шмат гадоў вораг працаваў над тым, каб заслаць сваіх агентаў у розныя органы ўлады і сілавыя структуры Украіны.

Цяпер затрыманаму абраная мера стрымання ў выглядзе ўтрымання пад вартай. У рамках крымінальнай справы прадаўжаюцца следчыя дзеянні па ўстанаўленні ўсіх абставін выкрытых правапарушэнняў.

Дасудовае расследаванне праводзілі супрацоўнікі СБУ Львоўскай вобласці пры працэсуальным кіраўніцтве Львоўскай абласной пракуратуры.