Што вядома пра сітуацыю ў «Нардыне» на гэты момант

Пагаворваюць пра «крата» сярод персаналу.

Міністэрства аховы здароўя прыпыніла ліцэнзію медыцынскага цэнтра «Нардын» з 15 жніўня. Але афіцыйных дакументаў ад Міністэрства аховы здароўя адміністрацыя цэнтру пакуль не атрымала. «Люстэрка» расказвае падрабязнасці.

Міністэрства аховы здароўя заявіла наконт прыпынення ліцэнзіі медцэнтра «Нардын» 3 жніўня. Ні ўчора, ні сёння на сайце медычнага цэнтру не было і няма ніякай інфармацыі пра гэта.

Між тым у кол-цэнтры, куды мы патэлефанавалі, як звычайны пацыент, заявілі, што медцэнтр прыпыняе працу:

– З 15 жніўня на нявызначаны тэрмін, – адказваюць пацыентам у кол-цэнтры. – На сайце інфармацыі няма, таму што мы да гэтага часу не атрымалі афіцыйны ліст ад Міністэрства аховы здароўя. Пакуль запісу няма, пра ўзнаўленне працы мы сказаць не можам.

Між тым супрацоўнік цэнтра, з якім мы здолелі паразмаўляць на ўмовах ананімнасці, расказаў, што пакуль ад кіраўніцтва няма ніякіх тлумачэнняў, што будзе далей:

– Прыёмы лекараў і аперацыі скасоўваюцца, ставяцца ў «ліст чакання» ці пераносяцца на час да 15 жніўня. Калектыў медцэнтра (а гэта больш як 450 супрацоўнікаў. – Заўвага рэд.) адпраўляюць за свой кошт з 15 жніўня. Усе прыгнечаныя, вядома.

Паводле словаў нашага суразмоўцы, 13 траўня, калі затрымлівалі вядомага лекара Сайкова, прэтэнзіі ў ДФР былі да супольнага прадпрыемства ТАА «Нардын». У медыцынскага цэнтра «Нардын» – іншая юрыдычная асоба.

– Тады СП аштрафавалі на 500 тысячаў, – тлумачыць супрацоўнік. – Магчыма, хочуць аштрафаваць і медцэнтр.

Іншы наш суразмоўца, знаёмы з сітуацыяй, гаворыць, што ў гэты момант крымінальную справу ў дачыненні да Змітра Сайкова не завялі.

– Пакуль усё на стадыі расследавання. Ёсць меркаванне, што вызначаюць «адкупны кошт», – растлумачыў ён. – Што тычыцца Міністэрства аховы здароўя, пагаворваюць пра «крата» сярод персаналу. Гавораць, што пры праверцы знайшлі тры ампулы лекаў, якіх там не павінна быць апрыёры. Галоўная медсястра была моцна здзіўленая. Але ў цэлым прыпыненне ліцэнзіі не стала такой ужо нечаканасцю. Праверка Міністэрства аховы здароўя прайшла, акт кіраўніцтва атрымала. Паводле акта міністэрства магло часткова прыпыніць ліцэнзію, але вось каб цалкам – гэтага, вядома, ніхто не чакаў.

Між тым парушэнні, якія пералічыла Міністэрства аховы здароўя пасля праверкі «Нардына», шмат у чым супадаюць з парушэннямі, знойдзенымі ў «Лодэ». Сярод іншага, шэсць з дзевяці пунктаў:

прадпрымальніцкая дзейнасць у месцы, не ўказаным ліцэнзіяй,

неналежнае захоўванне лекаў і наяўнасць лекаў са скончаным тэрмінам прыдатнасці,

парушэнне патрабаванняў клінічных пратаколаў лекавання,

парушэнні ў правядзенні медаглядаў і выдачы бальнічных,

парушэнні парадку арганізацыі неадкладнай дапамогі,

парушэнні санітарна-эпідэміялагічных патрабаванняў, санітарных нормаў, правілаў і гігіенічных нарматываў.

Яшчэ тры – гэта: парушэнні пры псіхіятрычнай дапамозе, парушэнні пры прызначэнні псіхатропных лекавых сродкаў і парушэнні ў парадку звароту наркатычных сродкаў ва ўстанове.

«Нардын» – не першы прыватны медцэнтр, які трапіў пад пільную ўвагу ўладаў: Міністэрства аховы здароўя прыпыніла з 16 траўня дзеянне ліцэнзій на медыцынскую дзейнасць «Клінікі А1» і «Лодэ», патлумачыўшы гэта парушэннем заканадаўства аб ахове здароўя, санітарна-эпідэмічным стане і ліцэнзаванні.

Медыцынскі цэнтр «Лодэ» адчыніўся 16 чэрвеня, праз паўтара месяца пасля прыпынення ліцэнзіі. Між тым рахункі сеткі медцэнтраў заблакаваныя да гэтага часу. А вось «Клініка А1» пасля праверкі і зусім зачыняецца. Як высветлілася, здарыўся канфлікт кіраўнікоў. Праз гэта адзін з іх напісаў скаргу ў Міністэрства аховы здароўя на сваю ж кампанію.