Гарадзенца асудзілі да 2,5 гадоў калоніі за лайкі ў сацсетцы

Пастанову вынес суддзя Дзмітрый Кедаль.

13 снежня 2022 года ў судзе Кастрычніцкага раёна Гародні Анатоля Лявоніка асудзілі да двух з паловай гадоў пазбаўлення волі ў калоніі агульнага рэжыму. Такую пастанову прыняў суддзя Зміцер Кедаль, паведамляюць праваабаронцы.

36-гадовага жыхара Гародні прызналі вінаватым паводле двух артыкулах: ч. 2 арт. 367 і ч. 2 арт. 368 Крымінальнага кодэкса. Яго судзілі за тое, што ён пакінуў у сваім профілі ў «Аднакласніках» публікацыі, якія змяшчаюць «зневажальную інфармацыю» пра Лукашэнку.

Вядома, што Анатоль родам з Зэльвенскага раёна, у яго ёсць двое дзяцей. Да затрымання ён працаваў кладаўшчыком. 13 студзеня 2023 года Анатоль Лявонік быў унесены ў «спіс экстрэмістаў».

Суддзя Дзмітрый Кедаль прызнаў Лявоніка «вінаватым» паводле абодвух артыкулаў, якія яму ставіліся ў віну, і асудзіў яго да двух гадоў пазбаўлення волі паводле ч. 2 арт. 368 Крымінальнага кодэкса і двух з паловай гадоў пазбаўлення волі – паводле ч. 2 арт. 367 Крымінальнага кодэкса. Шляхам паглынання менш строгага пакарання стражэйшым канчаткова Анатоля Лявоніка прысудзілі да двух з паловай гадоў пазбаўлення волі ў калоніі агульнага рэжыму.