Падаткі, пенсіі, дапамогі на дзяцей, камунальныя паслугі, выезд за мяжу: якія змены чакаюць беларусаў у лютым

Навацыі паўплываюць на таўшчыню партманетаў.

З лютага вырасце адзіны падатак для індывідуальных прадпрымальнікаў і фізічных асоб. У наступным месяцы таксама перагледзяць дапамогу на дзяцей да трох гадоў, а таксама мінімальныя працоўныя і сацыяльныя пенсіі. У лютым беларусы атрымаюць цяжкія рахункі за жыллёва-камунальныя паслугі. У наступным месяцы таксама маюць абнавіць базу «дармаедаў». Zerkalo.io сабрала лютаўскія змены, якія паўплываюць на таўшчыню партманетаў беларусаў.

Падаткі паводле падвышаных ставак

З лютага істотна вырасце, як і планавалася, адзіны падатак для фізічных асоб, якія працуюць без ІП. Напрыклад, для рэпетытараў у Менску — з 82 да 164 рублёў штомесяц, а для будаўнікоў — з 292 да 438 рублёў. Стаўкі гэтага збору паднялі ў студзені, калі абнародавалі абноўлены Падатковы кодэкс, але ўжываць павышаную стаўку пачнуць з лютага.

З наступнага месяца ў Беларусі таксама вырастуць пэўныя падаткі. Напрыклад, плаціць падатак паводле новай стаўкі з наступнага месяца трэба будзе ўладальнікам аграсядзіб. Як і планавалася, для іх паднялі падатак да 37 рублёў за месяц. У 2022 годзе збор складаў 31 рубель. Апошні раз гэты падатак падвышалі з пачатку мінулага года.

Атрымаем рахункі паводле новых тарыфаў

З 1 студзеня ў Беларусі ўзнялі тарыфы на шмат якія жыллёва-камунальныя паслугі. Адпаведна, у лютым беларусы атрымаюць цяжкія рахункі за студзень дзеля росту тарыфаў.

Перагледзяць паасобныя пенсіі ды дапамогі на дзяцей

У канцы студзеня ўлады маюць абвясціць, як з 1 лютага зменяцца мінімальныя працоўныя і сацыяльныя пенсіі. Іх пераглядаюць раз на квартал, іх сума дапасаваная да бюджэту пражытковага мінімуму. Напрыклад, сацыяльная пенсія цяпер складае 169,92 рубля.

Працоўныя пенсіі ў 2023 годзе, як раней анансавалася, сёлета могуць быць павышаны тры разы.

З 1 лютага ў Беларусі таксама маюць перагледзець дапамогу для догляду дзіцяці да 3 гадоў, яе сума дапасаваная да сярэдняга заробку ў краіне.

З наступнага месяца таксама маюць перагледзець суму аднаразовых выплат у сувязі з нараджэннем дзіцяці. Яна залежыць ад сумы бюджэту пражытковага мінімуму, але дакладныя лічбы яшчэ не абвясцілі.

Збор за выезд за мяжу на аўтамабілі

З 1 лютага на тэрыторыі Віцебскай вобласці прадоўжаць спагнанне збору за пераезд транспартнымі сродкамі дзяржаўнай мяжы ў кантрольных пунктах. Пастанову аб гэтым прыняў Віцебскі абласны савет дэпутатаў 30 снежня.

ІП да 1 сакавіка трэба заплаціць страхавыя ўнёскі

Індывідуальныя прадпрымальнікі маюць не пазней за 1 сакавіка выплаціць унёскі ў ФСАН за папярэдні год. Мінімальная сума - 2 006,59 рубля, калі ІП працаваў на працягу ўсяго года.

Абновяць дармаедскую базу

У лютым чыноўнікі актуалізуюць базу незанятага ў эканоміцы насельніцтва. Тым, хто патрапіць у яе і хто мае ва ўласнасці жыллё, давядзецца аплачваць паводле поўных тарыфаў газ, ацяпленне і гарачую ваду.

Нагадаем, базу абнаўляюць штоквартальна. Дакументы, якія пацвярджаюць працу або навучанне за мяжой, трэба падаць у камісію для каардынацыі дзейнасці спрыяння занятасці да 21 кастрычніка, 21 студзеня, 21 красавіка і 21 ліпеня адпаведна.