Беларуска сцвярджае, што сфатаграфавала «чупакабру»

Жанчына доўга адыходзіла ад убачанага.

Жанчына са Смаргонскага раёна сцвярджае, што сфатаграфавала «чупакабру».

«Спачатку мне падалося, што гэта рысь, потым леапард. Як жывёліна падышла бліжэй да дома - падумала, што ліса. А як прысела - кенгуру! – расказвае жанчына сваю гісторыю выданню «Светлы шлях».

«Спераду худая, але зад масіўны. Нос востры, даўгаваты, не такі, як у рысі ці леапарда. Увесь у нейкіх ружовых плямах, амаль голы, толькі зрэдку поўсць уздыбленая. Падышла яна да нашай хаты даволі блізка, ад паркана - на метры два. Спакойна так прайшла, нібы на шпацыры. Я так спалохалася, так усхвалявалася, пачала на тэлефон фатаграфаваць. Потым доўга адыходзіла ад убачанага. І сёння супакоіцца не магу: іду, аглядаюся, каб не накінуўся на мяне гэты звер», - распавяла жанчына.

Ірына адзначыла, што чула пра «чупакабру», але ніколі яе не бачыла. Як знайшла фатаграфію ў інтэрнэце, адразу заявіла: «Вельмі падобны звер!».

Варта адзначыць, што «чупакабру» перыядычна бачаць у розных рэгіёнах Беларусі. Так жыхары адной з вёсак у наваколлях Гародні мінулым летам паскардзіліся на невядомага звера.