Пуціну няма чаго супрацьпаставіць заходнім танкам

Вайсковы экспэрт аб тым, як сучасныя танкі паўплываюць на ход вайны.

Такім чынам, агульная колькасць танкаў заходняга ўзору, якія перададуць Украіне, ужо перасягнула за 300, гэта значыць, больш за 3 паўнавартасныя брыгады. І не так даўно я разглядаў магчымасці фармавання рот/батальёнаў/палкоў/брыгад з тых ці іншых заходніх АБТ, піша ўкраінскі вайсковы экспэрт Аляксандр Каваленка. Але як у танкавым пытанні ідуць справы ў нашага ворага?

Цяпер шмат гавораць аб ракетах у Расеі, іх дэфіцыце і магчымасцях ВПК РФ папаўняць іх колькасць, але не згадваюць яшчэ адзін вельмі важны інструментарый акупантаў - танкі. Бо менавіта праз танкавыя кулакі Расея здольная рэалізоўваць як наступы, так і абарону.

Між тым, на сёння фіксуецца сур'ёзная і я б нават сказаў крытычная некамплектацыя падраздзяленняў РАВ (расейскіх акупацыйных войскаў - заўв.) танкавай кампанентай. Танкі знікаюць як абавязковы штатны элемент таго ці іншага падраздзялення.

На момант уварвання ва Украіну ў расейскага войска, паводле розных крыніц, было ад 2600 да 3300 баяздольных танкаў. На сёння, паводле інфармацыі Генштаба УСУ знішчаныя 3182 танкі РАВ. Паводле звестак Oryx – 1650.

Асобна адзначу, што Oryx фіксуе толькі тую тэхніку, знішчэнне, пашкоджанне або «затрафей» якой пацверджаныя дакументальна (фота ці відэа). З іншага боку, тэхніка, якая застаецца іржавець на полі бою або вывезеная ў Расеі на могілкі, не фіксуецца.

Я ўжо неаднаразова даводзіў, што звесткі Генштаба УСУ аб знішчанай тэхніцы максімальна адпавядаюць рэчаіснасці, з мінімальным адхіленнем +/-N%. Гэта дазваляе паўнавартасна выкарыстоўваць гэтыя звесткі як максімальна дакладныя.

Факт жа росту дэфіцыту танкаў у варожых падраздзяленняў пацвярджае каласальныя танкавыя страты РАВ, супастаўныя са стратамі ўсяго баяздольнага патэнцыялу і пераход на выкарыстанне кансерваванага рэсурсу са складоў і цэнтраў захоўвання.

Гэта значыць, танкавы крызіс у РАВ, як той казаў - на твар. Як яго развязваць? Здымаць танкі з захоўвання і кансервацыі. Як-ніяк, а паводле адкрытых звестак у Расеі на захоўванні блізу 15 тысяч танкаў Т-72, Т-80, Т-90, Т-64 і Т-62.

Здавалася б, раскансервуй - не хачу! Але, не.

Справа ў тым, што пераважная большасць з гэтых танкаў знаходзіліся на захоўванні ў, мякка кажучы, нездавальняючых умовах і аднаўленню, таксама, мякка кажучы, папросту не падлягаюць. Іншая частка патрабуе ТА і рамонту.

Фактычна, да аднаўлення баяздольнасці з расейскіх цэнтраў захоўвання прыдатныя блізу 20% усіх наяўных танкаў. Груба кажучы, гэта да 3 тысяч танкаў. Ізноў жа, сур'ёзная колькасць для ўзнаўлення баяздольнасці войска, але ўсё ж...

Рамонт гэтых танкаў і вяртанне ім баяздольнага стану займае час. Напрыклад, аднаўленне пасля кансервацыі Т-72 можа заняць ад двух тыдняў да месяца. У Т-80 працэс больш складаны і гэта прыблізна месяц.

Акрамя таго, у большасці выпадкаў аднаўленне адбываецца ў фармаце канібалізму, гэта значыць, выкарыстоўваюць запчасткі з іншых танкаў. Такі фармат асабліва распаўсюджаны пры аднаўленні Т-64, а так жа Т-62.

Варта адзначыць, што Т-62 прасцей і хутчэй за ўсё аднаўляюцца, але яны зусім не адпавядаюць выклікам і ўзроўню сучаснай вайны. Але іншага ў расейцаў выйсця няма, менавіта Т-62 хутчэй за ўсё могуць адпраўляць на фронт.

У выніку, Расея сутыкнулася з сур'ёзнай праблемай - небывалым дэфіцытам танкаў. Гэтую праблему яна спрабуе развязаць за кошт «дружалюбных» краін, напрыклад Беларусі, вывозячы з 969-й базы рэзерв танкаў АБТ Т-72А.

А цяпер самае цікавае.

Украіна на цяперашнім этапе дапамогі ад міжнародных партнёраў атрымае больш за 300 сучасных танкаў. Што зможа супрацьпаставіць Расея за тыя ж тэрміны гэтаму патэнцыялу? Старыя Т-72, Т-80 і Т-62, не ўсе ў спешцы нават абсталяваныя ДЗ?

Але галоўнае тое, што Расея не зможа забяспечыць тое, за кошт чаго заўсёды старалася перамагаць - масавасць. У яе няма магчымасці ствараць колькасны дысбаланс АБТ у зоне БД, але, тым не менш, мы з вамі становімся сведкамі паступовага, але ўпэўненага расту дысбалансу. Якаснага дысбалансу.