Украінскія танкісты паказалі трафейную тэхніку

Цяпер расейская тэхніка адпрацоўвае па пазіцыях сваіх былых уладальнікаў.

На ўзбраенні Узброеных сіл Украіны нямала трафейнай расейскай тэхнікі. Так, вайскоўцы 5-га асобнага штурмавога палка паказалі працу захопленага расейскага танка Т-90, які ў свой час УСУ захапілі ў Сумскай вобласці. А заадно танкісты распавялі і аб сваёй паўсядзённай працы.

Як інфармуе censor.net, на відэа, апублікаваным праектам «Украінскі Сведка», трафейная расейская тэхніка адпрацоўвае па пазіцыях сваіх былых уладальнікаў, гэта значыць, саміх расейцаў. Цяпер ёю кіруе адно з танкавых падраздзяленняў УСУ.

Да трафейнай тэхнікі належыць танк Т-90, распрацаваны яшчэ за Савецкім Саюзам. Ён уяўляе сабой мадэрнізацыю танка Т-72 «Урал», які выкарыстоўваўся падчас баявых дзеянняў у Сірыі, Іраку, Судане і шэрагу іншых краін.

Журналісты «Украінскага Сведкі» фіксуюць баявыя дзеянні супраць акупантаў: спачатку па пазіцыях ворага працавалі ўкраінскія мінамёты, а затым у ход пайшлі танкі.

— Карэктаваннем агню займаецца выведвальны дрон, — расказвае камандзір баявой машыны з пазыўным «Шарпей».

«Дзякуючы гэтаму ўдаецца дасягнуць амаль стоадсоткавай дакладнасці». Таксама вайсковец распавёў, што інтэнсіўнасць баёў на гэтым адрэзку фронту вельмі высокая. «Яны лезуць і лезуць», – кажа ён. «Былі дажджы, потым маразы. Надвор'е сырое, бруднае, а яны ўсё адно лезуць па брудзе».

На пытанне аб страху «Шарпей» адказвае: «Я не магу паказваць сваім падначаленым, што я баюся. Калі чалавек баіцца, ён пачынае губляцца і памыляцца».

Падчас здымкі здымачная група атрымала агонь у адказ. На шчасце, ніхто не пацярпеў. Як высветлілася пасля, на месца, дзе была здымачная група, даслоўна праз паўхвіліны пасля агляду прыляцела блізу дзясяці расейскіх набояў.