На валютным рынку Беларусі – гістарычны антырэкорд

Абменнікі ўжо адрэагавалі.

На таргах Беларускай валютна-фондавай біржы 3 кастрычніка даляр падаражэў да 3,3326 рубля. Гэта гістарычны антырэкорд - такой дарагой амерыканская валюта ў нашай краіне яшчэ не была, адзначае «Зеркало».

Папярэдні рэкорд курса даляра быў устаноўлены ў сакавіку 2022 года - 3,3195 рубля.

На навіны з Беларускай валютна-фондавай біржы аператыўна рэагуюць абменнікі. Самы высокі курс продажу банкамі даляра - 3,355 рубля («Беларусбанк», «Сбер Банк»), а самы нізкі - 3,325 рубля («Статусбанк»).

Удакладнім, што ў розных абменніках аднаго банка курсы валют могуць адрознівацца.

Выгадней за ўсё здаваць амерыканскую валюту ў «Тэхнабанк» - 3,326 рубля.

Самы высокі курс продажу банкамі еўраў - 3,52 рубля («Банк БелЗЭБ»), а самы нізкі ў «Статусбанку» (3,489 рубля).

Еўра больш выгадна здаваць у «Альфа Банк», «БНБ-Банк», «Статусбанк» — 3,485 рубля.

Нагадаем, у Беларусі захоўваюцца цяжкасці з гатоўкай еўраў у абарачэнні. Многія банкі цяпер прадаюць толькі тыя банкноты, якія здаюць іншыя кліенты.