На фронце ва Украіне забунтавалі вайскоўцы з 488-га палка УС РФ

Прычынаў для скаргаў шмат.

Расейскія акупанты не пакідаюць спробаў дастукацца да свайго вайсковага камандавання праз праблемы на фронце. Новы відэазварот да міністра абароны Сяргея Шайгу і кіраўніка Генштаба Валерыя Гермасімава запісала група салдатаў РФ са складу 1-га батальёна 488-га гвардзейскага мотастралковага палка, піша dialog.ua.

Ужо традыцыйна акупанты паскардзіліся на дрэннае забеспячэнне, а таксама на адсутнасць ратацый. Яны запэўніваюць, што на перадавой іх павінны былі мяняць кожныя 10 сутак, а замест гэтага нават ежу так часта не возяць. Асабліва моцна вайскоўцы РФ незадаволеныя франтавой медыцынай.

«Сітуацыя склалася, мякка кажучы, катастрафічная. Байцы вымушаныя 2-3 тыдні знаходзіцца на пазіцыях без падвозу ежы, вады і боепрыпасаў. А мяняць нас абяцалі кожныя 10 дзён! Сітуацыя з медыкаментамі яшчэ горшая: на пазіцыях банальна не стае нават бінтоў, параненыя павінны некалькі дзён ляжаць, перацягнутыя проста джгутамі і чакаць эвакуацыю, якая ніяк не прыходзіць. Кіраўніцтва палка пра гэтую сітуацыю ў курсе, але ніякіх захадаў не ўжывае», – паскардзіліся вайскоўцы РФ.

Ніякай рэакцыі ад вайскова-палітычнага кіраўніцтва на гэтыя скаргі няма.