Ашуканцы прыдумалі новую схему падману беларусаў

Будзьце пільныя.

У Кастрычніцкае РУУС Гародні звярнулася жанчына, якая расказала, што днямі ёй затэлефанавалі супрацоўнікі банка. Яны пацікавіліся, якая сума грошай знаходзіцца ў яе на руках.

Пасля адказу "1000 рублёў" "супрацоўнікі банка" сталі пераконваць жанчыну, што яна парушае закон. Нібыта на руках можна трымаць не больш за 500 рублёў, паведамляе прэсавая служба МУС.

Жанчына адправілася ў банк, каб перавесці грошы на названы рахунак. Аднак рэальная супрацоўніца банка пераканала, што жанчыне тэлефанавалі ашуканцы і ніякія грошы пераводзіць не трэба.

Міліцыя просіць людзей быць пільнымі, адзначае, што зламыснікі не стаяць на месцы, а штодзень прыдумляюць усё новыя спосабы падману.

Таксама ў міліцыі нагадваюць, што рэальныя супрацоўнікі банка ніколі не будуць даведвацца пра інфармацыю аб аплатных картках, а пагатоў патрабаваць перавесці грошы на якія-небудзь рахункі.