Зяленскі заявіў аб ліквідацыі Пуціна

І раскрыў дэталі расейскага плана.

Украіна мае права ліквідаваць расейскага дыктатара Уладзіміра Пуціна, калі ў яе з'явіцца такая магчымасць. Краіна-агрэсарка таксама не адмаўляецца ад планаў ліквідаваць украінскае кіраўніцтва.

Аб гэтым заявіў прэзідэнт Украіны Уладзімір Зяленскі ў інтэрв'ю The Sun.

З ягоных слоў, Расея не адмаўляецца ад планаў ліквідацыі ўкраінскага кіраўніцтва і спрабуе зрабіць гэта якім-небудзь магчымым спосабам.

«Яны будуць выкарыстоўваць усе інструменты, якія ў іх ёсць», – сказаў Зяленскі.

У той жа час, з яго слоў, Украіна ў сваю чаргу таксама ліквідуе Пуціна, калі з'явіцца такая магчымасць.

Прэзідэнт адзначыў, што Украіна мае поўнае права гэта зрабіць, бо абараняе сваю зямлю.

«Гэта вайна, і ва Украіны ёсць усе правы абараняцца», – падкрэсліў Зяленскі.

Пры гэтым кіраўнік украінскай дзяржавы адмовіўся адказваць на пытанне, ці мае дачыненне Украіна да замахаў на калабарантаў і расейскіх чыноўнікаў на часова акупаваных тэрыторыях.

«Я не магу абмяркоўваць з вамі нейкія спецаперацыі ўкраінскай выведкі, сакрэтнай службы ці якіх-небудзь спецпадраздзяленняў. Ёсць некаторыя моманты, якія мы не абмяркоўваем», - дадаў прэзідэнт.

Зяленскі раскрыў дэталі расейскага плана «Майдан-3»

У інтэрв'ю The Sun прэзідэнт Украіны таксама сказаў, што расейская аперацыя «Майдан-3» запланаваная на канец 2023 года. Ён таксама прызнаўся, што страціў лік спробам забіць яго з пачатку поўнамаштабнага ўварвання.

«Аперацыя называецца «Майдан-3», яна накіраваная на змену прэзідэнта. Можа, не шляхам забойства. Яны будуць выкарыстоўваць усе інструменты, якія ў іх ёсць», - сказаў Зяленскі.