Бітва за Аўдзееўку: у WSJ раскрылі план Расеі

Расейцы наступаюць, як зомбі.

Бітва за Аўдзееўку можа адзначыць для Украіны пачатак шматмесячнай абароны - ва ўмовах, калі ЗША знаходзяцца ў цісках парламенцкага паралічу, а Еўропа з цяжкасцю нарошчвае ваенную вытворчасць, нявызначанасць з пастаўкамі заходніх боепрыпасаў абмяжоўвае магчымасці УСУ, піша The Wall Street Journal.

Масква спрабуе скарыстацца сітуацыяй, аднак першыя атакі Расеі на Аўдзееўку ў кастрычніку былі няўдалымі. Расейцы панеслі цяжкія страты ў жывой сіле і тэхніцы.

Цяпер МА РФ змяніла тактыку, накіроўваючы наперад невялікія групы пяхоты. Абодва войскі з цяжкасцю манеўруюць на адкрытай, замінаванай мясцовасці пад небам, якое гудзе ад беспілотнікаў.

Журналісты выдання акцэнтуюць, што насельніцтва РФ амаль у чатыры разы перавышае насельніцтва Украіны, а значыць Масква можа дазволіць сабе мець незлічоныя тысячы салдат дзеля нязначных поспехаў.

Тым часам Украіна з цяжкасцю папаўняе страты пяхоты, панесеныя падчас летняга контрнаступу і абароны Бахмута.

Са слоў украінскіх вайскоўцаў, расейская пяхота ў атацы ў асноўным дрэнна навучаная, часта збіваецца ў кучу і становіцца лёгкай мішэнню.

“Яны наступаюць як зомбі. Некаторыя з іх свецяць ліхтарамі - удалы момант для любога кулямётчыка”, - кажа радавы Багдан Лысенка.

План РФ у тым, каб рушыць наперад паўночней і паўднёвей Аўдзееўкі, а затым паспрабаваць адрэзаць яе ад шляхоў забеспячэння.