Палестынскі тэрарыст са спісу на абмен адмовіўся вяртацца ў Газу
- 28.11.2023, 11:20
- 6,930
![Палестынскі тэрарыст са спісу на абмен адмовіўся вяртацца ў Газу](https://i.c97.org/ai/566957/aux-head-1696837529-20231009_hamas_360.jpg)
Яго абмянялі прымусова.
Падчас трэцяга этапу выканання пагаднення паміж Ізраілем і ХАМАС аб вызваленні закладнікаў адзін з палестынскіх тэрарыстаў, якіх вызваляў Ерусалім, не захацеў вяртацца ў Газу. Зняволены на імя Алаа Абу Саніма прасіў пакінуць яго ў ізраільскай турме, бо не хацеў зноў апынуцца на тэрыторыі анклава.
Аб гэтым паведамілі ізраільскія мэдыі. Ён не хацеў вяртацца ў зону Газа, бо ў гэтым выпадку больш не зможа атрымліваць "заплату" ад адміністрацыі Палестынскай аўтаноміі.
Нягледзячы на ягоныя пратэсты, Алаа Абу Саніма быў вызвалены і дастаўлены ў Газу ў рамках абмену паміж Ізраілем і ХАМАС.
Вядома, што даўней Саніма перайшоў мяжу Ізраіля, пасля чаго здаўся праваахоўнікам і заявіў, што мерыцца ўчыніць тэракт. Аднак напраўду мужчына зрабіў гэта дзеля атрымання выплат ад Палестынскай аўтаноміі.
Адзначым, што ў абмен на вяртанне ізраільскіх закладнікаў Ерусалім вызваляе палестынскіх арабаў, якіх утрымліваюць у турмах Дамон, Мегіда, Офэр, Кацыёт, Рамон і Нафха.
Калі выкрадзеныя ізраільцяне прыбываюць на радзіму, былых зняволеных-палестынцаў садзяць у аўтобус Чырвонага Крыжа і ў суправаджэнні ізраільскай паліцыі і сіл бяспекі развозяць на адпаведныя кантрольныя пункты.