Ліз Трас: Наступным прэзідэнтам ЗША павінен стаць кансерватар, які выправіць Расею ў накаўт

Экс-прэм'ерка Вялікай Брытаніі заклікала Вашынгтон забяспечыць Украіну зброяй.

Наступным прэзідэнтам ЗША павінен стаць кансерватыўны кандыдат ад Рэспубліканскай партыі, які наважыцца называць варожыя рэжымы злом і пагрозай, паколькі свет мае патрэбу ў амерыканскім лідарстве, заявіла былая прэм'ерка Вялікай Брытаніі Ліз Трас у артыкуле для Wall Street Journal.

«Маскву закалыхалі ілюзіяй, што яе ўзброеныя сілы могуць супрацьстаяць моцы Вашынгтона. Але Захад павінен забяспечыць Украіну зброяй, неабходнай для нанясення накаўтавальнага ўдару па Расеі. Гэта стала б прамым пасланнем аўтарытарным заступнікам Расеі ў Кітаі і Іране», – напісала Трас.

Экс-прэм'ерка заклікала для «схілення чары шаляў на бок Украіны» забяспечыць колькасную ваенную перавагу УСУ. Акрамя таго, прадоўжыла яна, неабходна паскорыць працэс уступлення гэтай дзяржавы ў NATO.

Трас падзялілася назіраннем, што занадта многія на Захадзе супакоіліся, калі СССР саступіў у халоднай вайне і распаўся, паверыўшы, «што перамога свабоды і дэмакратыі вечная». На ейную думку, гэта не так. Яна прывяла прыклад: Кітай прынялі ў Сусветную гандлёвую арганізацыю (СГА) на выгадных умовах, але цяпер Сі Цзіньпін, які «абвясціў сябе пажыццёвым кіраўніком» Кітая, «прыгнечыў дэмакратыю і свабоду слова ў Ганконгу і кіраваў парушэннямі правоў чалавека ў правінцыі Сіньцзян».

Акрамя таго, Іран падтрымлівае ХАМАС і іншыя групоўкі баевікоў, а таксама працуе над сваім ядзерным патэнцыялам, у той час пакуль ЗША «марна чакаюць, калі Тэгеран падпіша Супольны ўсёабдымны план дзеянняў у ядзернай угодзе». Трас задалася пытаннем, ці дзіўная такая сітуацыя, у якой урады гэтых краінаў «дзейнічалі бяскарна» пры недастатковым асуджэнні з боку іншых дзяржаваў.

«Падчас халоднай вайны ЗША ўзначальвалі альянс краінаў вольнага свету, у тым ліку Вялікую Брытанію і Японію, кантралюючы экспарт у Кітай і камуністычныя краіны Усходняй Еўропы. ЗША павінны зноў узначаліць свабодны свет, гарантуючы, што мы не экспартуем тэхналогіі або тавары, якія могуць быць выкарыстаныя супраць нас – эканамічнае NATO», – дадала былая брытанская прэм'ерка.