Як кампаніі шпіёняць за супрацоўнікамі

Высвятляецца, спосабаў вельмі шмат.

Калі вам здаецца, што ваш працадаўца за вамі сочыць, то хутчэй за ўсё вы маеце рацыю. Кампаніі звычайна апраўдваюць сачэнне клопатам аб прадуктыўнасці і маніторынгам наведвальнасці офіса. Спосабаў рабіць гэта вельмі шмат, распавядае Insider (пераклад – devby.io).

Пропускі

У многіх офісах дзейнічае праверка па пропусках. Звесткі аб тым, калі супрацоўнік прыходзіць і сыходзіць, неацэнныя для кампаній, якія хочуць вярнуць у офіс працаўнікоў, што звыкліся да аддаленай працы.

Напрыклад, так працуе Amazon, дзе RTO-палітыку навязваюць вельмі цвёрда. Першапачаткова кампанія абяцала збіраць толькі абязлічаныя і абагульненыя звесткі наведвальнасці, каб ацэньваць загружанасць і аптымізаваць выкарыстанне офісных памяшканняў. Але зараз кожны супрацоўнік можа паглядзець сваю персанальную статыстыку прысутнасці ў карпаратыўных будынках за апошнія 8 тыдняў на ўнутраным HR-дашбордзе, звесткі ёсць у распараджэнні мэнэджараў, і яны нават могуць звальняць «прагульшчыкаў».

Наведвальнасць па ID-картах таксама трэкае Goldman Sachs, каб потым караць тых, хто занадта мала часу праводзіць у офісе. Сістэма паказвае яе ў працэнтах. Гэта значыць калі супрацоўнікі каманды павінны працаваць у офісе тры дні на тыдзень, наведвальнасць павінна быць не ніжэй за 60%. JPMorgan таксама генеруе на аснове такіх звестак справаздачы і дашборды, якія дапамагаюць мэнэджарам дамагацца выканання квот працы ў офісе.

Клавіятура, інтэрнэт і вэб-камера

Яшчэ адна прылада ў руках наймальнікаў – ПА для тайм-трэкінга (так званае bossware), якое дазваляе пазнаць, што ж робяць працаўнікі на сваіх ноўтбуках, і стала квітнець разам з аддаленай працай. Распрацоўнікі такога софту, напрыклад Time Doctor, прапануюць дашборды і справаздачы аб прадуктыўнасці супрацоўнікаў, уключаючы інфармацыю пра час прыходу і сыходу, перапынкі, выкарыстанне інтэрнэт-трафіку і дадаткаў. Time Doctor нават дазваляе кліентам рабіць скрыншоты і запісы экрана супрацоўнікаў. Некаторыя такія праграмы рэгіструюць націскі клавіш супрацоўнікамі і могуць актываваць мікрафон і камеру без іх ведама.

У JPMorgan, напрыклад, ёсць кастамная сістэма Workforce Activity Data Utility (WADU), якая збірае вельмі разнастайныя звесткі. Напрыклад, колькі часу кожны супрацоўнік выдаткаваў на сазвоны ў Zoom, імайлы, дакументы, а таксама калі яны браніруюць сабе месца ў офісе.

Эксперты ResumeBuilder у сакавіку праводзілі апытанне сярод 1000 амерыканскіх топ-мэнэджараў кампаній, чые супрацоўнікі ў асноўным працуюць цалкам аддалена або па гібрыдным графіку. 96% рэспандэнтаў адказалі, што іх кампаніі ўжываюць той ці іншы софт для сачэння за супрацоўнікамі. Да пандэміі такіх кампаній было толькі 10%.

Датчыкі перамяшчэння па офісе

Некаторыя працадаўцы адсочваюць нават тое, дзе менавіта ў офісе знаходзяцца людзі. Напрыклад, аўстралійская кампанія XY Sense прадае датчыкі, якія ўсталёўваюцца на столь і скануюць паверх. Так можна выяўляць перагружаныя і прасторы, якія мала выкарыстоўваюцца, каб (тэарэтычна) аптымальней эксплуатаваць офісныя паверхні. Распрацоўнікі сцвярджаюць, што распазнаваць асобных супрацоўнікаў датчыкі не ўмеюць, а людзі адлюстроўваюцца ў выглядзе кропак.

Смарт-кулер для вады

Вытворца інтэрактыўных разумных кулераў Bevi фіксуе частату выкарыстання сваіх агрэгатаў супрацоўнікамі. З гэтых звестак кампанія даведалася, што зараз прыходзіць у офіс да 9 гадзін раніцы і сыходзіць пасля 5 гадзін вечара стала больш супрацоўнікаў, чым да пандэміі.