На паўднёвым захадзе Беларусі абвясцілі план «Надвор'е»

Што нельга рабіць кіроўцам?

Дзяржаўтаінспекцыя Гарадзенскай вобласці ў панядзелак, 11 снежня, абвясціла аб увядзенні ў рэгіёне плана дадатковых мерапрыемстваў "Надвор'е". Як вынікае з назвы спецмерапрыемстваў, уся справа ў пагаршэнні варункаў надвор'я — сіноптыкі паабяцалі на Гарадзеншчыне моцныя снегапады і дождж. Зрэшты, мяркуючы з прагнозу Белгідраметцэнтра, такія метэаўмовы ў найбліжэйшыя тры дні ўсталююцца на ўсёй тэрыторыі Беларусі, піша telegraf.news.

"Для надання дапамогі дарожным арганізацыям у суправаджэнні спецтэхнікі, аператыўнага афармлення ДТЗ і надання дапамогі кіроўцам, якія трапілі ў цяжкую сітуацыю на дарозе, выведзены дадатковыя патрулі супрацоўнікаў ДАІ", - паведамілі ў ДАІ Гарадзенскай вобласці.

У МНС паведамілі пра наступныя фактары небяспекі, якія могуць чакаць беларусаў на дарогах у панядзелак, 11 снежня праз туман і галалёдзіцу:

- зніжэнне бачнасці,

- цяжкасць руху транспарту,

- павелічэнне імавернасці ўзнікнення дарожна-транспартных здарэнняў,

- рызыка траўматызму пешаходаў.

З-за пераменлівага надвор'я камунальныя службы Берасця 11 снежня перавялі на кругласутачны рэжым працы і абвясцілі аб пастаянным маніторынгу стану сітуацыі на дарогах горада, паабяцаўшы вывесці дадатковыя машыны для раскідання пяску і больш за 200 дворнікаў у выпадку ўтварэння галалёдзіцы, паведаміў мясцовы партал «БрэстСІЦІ».

Аб небяспечнай сітуацыі на дарогах праз мокры снег, дождж і галалёдзіцу папярэдзілі кіроўцаў і ў МУС Беларусі. У ведамстве папярэдзілі, што супрацоўнікі ДАІ будуць весці маніторынг сітуацыі на дарогах, а патрулі ДПС "арыентуюць на наданне дапамогі ўсім удзельнікам дарожнага руху, якія трапілі ў цяжкую сітуацыю".

Там таксама нагадалі кіоўцам аб асноўных правілах бяспечнага руху ў непагадзь:

- пераканацца ў спраўнасці тармазной сістэмы, шклоачышчальнікаў;

- не перавышаць хуткасны рэжым, не рабіць рызыкоўныя манеўры;

= павялічыць дыстанцыю і бакавы інтэрвал.

У сваю чаргу пешаходам нагадалі, што тармазны шлях кожнага транспартнага сродку ў такіх умовах на слізкай дарозе павялічваецца ў разы.

«Пераходзьце дарогу ва ўсталяваных месцах і толькі пераканаўшыся, што ўсе аўтамабілі паспелі спыніцца. Ва ўмовах недастатковай бачнасці абазначце сябе святлоадбіўнымі элементамі», — заклікалі ў МУС.

Белгідрамет спрагназаваў снег з дажджом для ўсёй краіны мінімум на тры дні

Мяркуючы з прагнозу Белгідрамета, неспрыяльныя ўмовы надвор'я чакаюцца «на большай частцы тэрыторыі краіны».

У панядзелак, 11 снежня, следам за атмасфернымі франтамі ў Беларусь, паводле слоў сіноптыкаў, пачне паступаць "цёплая вільготная паветраная маса атлантычнага паходжання". У выніку па ўсёй краіне чакаюцца ападкі ў выглядзе снегу і мокрага снегу, а на захадзе Беларусі - яшчэ і дажджы. У наступныя два дні, 12-13 снежня, сіноптыкі спрагназавалі мокры снег з дажджом ужо для ўсёй тэрыторыі Беларусі. Паводле іх слоў, туман, слабы галалёд і галалёдзіца на дарогах таксама захаваюцца з-за тэмпературных арэляў - мінімальная тэмпература паветра ноччу будзе вагацца ад -4°С да +1°С, максімальная днём - ад -2°С да +3°С.