Пяць самалётаў расейскіх авіякампаній зламаліся ў палёце за два дні

Перавозчыкі сталі лётаць, спадзяючыся на «рускае авось».

Самалёты расейскіх авіякампаній, якія засталіся без тэхнічнага абслугоўвання праз санкцыі, уведзеныя за ўварванне ва Украіну, працягваюць ламацца ў паветры, піша The Moscow Times.

У суботу борт Airbus А321 «Аэрафлота», які ляцеў з Санкт-Пецярбурга ў Маскву, запытаў аварыйную пасадку ў аэрапорце Шарамеццева. Пастанова аб экстраным прызямленні была прынятая праз адмову левага рухавіка, паведамілі «РИА Новости» экстранныя службы.

У 13:11 самалёт здзейсніў пасадку «ў штатным рэжыме». Ніхто са 162 пасажыраў не пацярпеў. Спецслужбы аглядаюць борт, паведамляе Маскоўская міжрэгіянальная транспартная пракуратура. У ведамстве абяцаюць прыняць «вычарпальныя меры рэагавання» ў выпадку выяўлення парушэнняў.

Таксама 2 снежня ў цюменскім аэрапорце «Рошчына» з тэхнічнай прычыны здзейсніў пасадку на запасны аэрадром самалёт Superjet 100 авіякампаніі «Ямал», які рухаўся з Наябрска ва Уфу, паведамляе Уральская транспартная пракуратура. На борце знаходзіўся 71 чалавек, не ўлічваючы экіпаж. Ніхто не пацярпеў. Пасля пасажыры былі адпраўлены ва Уфу на рэзервовым паветраным судне авіякампаніі.

1 снежня выйшлі са строю адразу тры самалёты. Airbus A321 «Аэрафлота», які ляцеў з Калінінграда ў Маскву, быў вымушаны прызямліцца ў пецярбургскім аэрапорце «Пулкава» праз спрацоўванне індыкацыі сістэмы кандыцыянавання кабіны пілотаў. Пасажыраў перасадзілі на Boeing 777 для далейшай дастаўкі ў сталіцу.

Раніцай таго ж дня ў МНС паведамілі, што іншы самалёт «Аэрафлота» – Boeing 737 з 408 пасажырамі на борце, які выконваў рэйс з Масквы, здзейсніў аварыйную пасадку ў Паўднёва-Сахалінску. Пастанова была прынятая праз спрацоўванне індыкацыі аб падзенні ціску на адным з шасці колаў стойкі шасі, удакладнілі ў авіякампаніі.

У Новасібірску ў самалёта «ІрАэра» з 78 пасажырамі на борце адмовілі аўтапілоты і закрылкі пасля вылету з аэрапорта Талмачова. Паводле звестак Shot, борт Superjet 100, які павінен быў накіравацца ў Талакан, зрабіў больш за дзевяць кругоў у зоне чакання перад тым як шчасна прызямліцца. Ніхто не пацярпеў. У прэс-службе «ІрАэра» паведамілі, што ў самалёта была памылка ў адным з каналаў сістэмы кіравання. Інцыдэнт будзе расследаваць Расавіяцыя.

У суботу авіякампанія S7 Airlines абвясціла аб скарачэнні палётнай праграмы ў некалькіх напрамках. Перавозчык растлумачыў гэта «сезонным пераразмеркаваннем самалётаў і аптымізацыяй раскладу». 15 студзеня будуць скасаваны палёты з Масквы ў Ніжні Ноўгарад і Чэлябінск. Акрамя таго, скароціцца колькасць штотыднёвых рэйсаў са сталіцы ў Валгаград, Пензу, Санкт-Пецярбург, Новасібірск і шэраг іншых гарадоў. Таксама з траўня 2024 года авіякампанія адменіць частку прамых пералётаў з Новасібірска ў Калінінград.

Пасажырам, якія набылі білеты на рэйсы, якія трапілі пад аптымізацыю, S7 прапанавала зрабіць поўнае вымушанае вяртанне, перабраніраваць вылет на даступныя даты або перааформіць білеты на рэйсы авіякампаніі са стыкоўкай у адным з базавых аэрапортаў.

Раней «Камерсант» пісаў, што перавозчык можа скараціць восеньска-зімовы расклад на 10-15% праз цяжкасці з абслугоўваннем Airbus A320/321 neo. Між іншым, у кампаніі ўзніклі праблемы з рамонтам рухавікоў P \u0026 W, з якімі не працуюць тэхнічныя арганізацыі Расеі і Ірана. У S7 не лятае і знаходзіцца на абслугоўванні амаль 20% парка, у тым ліку 13 з 39 neo.

Расейская грамадзянская авіяцыя стала часцей сутыкацца з тэхнічнымі праблемамі пасля таго, як санкцыі адрэзалі яе ад абслугоўвання лайнераў і паставак арыгінальных запчастак. Каб падтрымліваць самалёты ў працоўным стане, Расавіяцыя раздала авіякампаніям сертыфікаты распрацоўшчыкаў авіятэхнікі. Гэта дазволіла перавозчыкам самастойна рабіць рамонт суднаў, пасля чаго яны пачалі разбіраць некаторыя самалёты на камплектуючыя для абслугоўвання іншай часткі свайго парку.

З вясны 2022 авіякампаніі патрабуюць ад персаналу не ўносіць дэфекты тэхнікі ў бартавыя журналы, у выніку чаго самалёты часта лётаюць няспраўнымі, пісаў «Праект». Таксама паведамлялася, што пілоты «Аэрафлота» пачалі адключаць тармазы, якія адмовілі, праз немагчымасць іх замяніць. Са слоў былога пілота авіякампаніі Nordwind, многія перавозчыкі сталі лётаць, спадзяючыся на «рускае авось».