На літоўскай мытні кожны грузавік з Беларусі абшукваюць

Шукаюць цыгарэты.

Літоўская мытня з 23 лістапада ўзмацніла кантроль за грузавымі перавозкамі на мяжы з Беларуссю. Cа слоў прадстаўніка Мытнай крымінальнай службы Гедымінаса Кулікаўскаса, кожны грузавік, які ўязджае ў краіну, нават калі ён без грузу, правяраецца вельмі старанна.

«Правяраюцца абсалютна ўсе грузавыя аўтамабілі: пустыя, поўныя, з заяўленым грузам ці без яго, кузавы грузавікоў правяраюцца і нават вымяраюцца на наяўнасць схованак, яны ўзважваюцца. Не кажучы ўжо аб рэнтгенаўскім прасвечванні, ускрыцці брызента», – прыводзіць яго словы BNS.

З ягоных слоў, дбайныя праверкі значна падаўжаюць працэс агляду, што можа прывесці да павелічэння чэргаў транспартных сродкаў.

«Гэта, на жаль, непазбежна. Фізічныя магчымасці кантрольна-прапускных пунктаў абмежаваныя, і калі праца ідзе з максімальнай інтэнсіўнасцю, гэта займае пэўны час», – сказаў ён.

Генеральны сакратар Літоўскай нацыянальнай асацыяцыі аўтаперавозчыкаў «Лінава» Зянонас Буйвідас адзначыў, што такія праверкі павялічваюць час перасячэння мяжы і заўсёды суправаджаюцца ўзмоцненым кантролем.

«У нас ёсць толькі вельмі простыя скаргі на тое, што час транзіту павялічыўся. Гэта сталая, хранічная рэч. Гэта заўсёды так, калі ёсць такі кантроль – чэргі адразу становяцца даўжэйшымі», – сказаў ён.

Аднак, са слоў Кулікаўскаса, такія праверкі эфектыўныя.

Адбываецца сапраўды дбайная праверка кожнага грузавога аўтамабіля, і гэта дае свае вынікі, запэўніў ён.

Служба паведаміла, што падчас адной з такіх праверак на аўтадарожным пасту Райгардас у баку бензавоза, які прыбыў з Беларусі, было знойдзена амаль 600 каробак цыгарэт.

За 9 месяцаў сёлета падчас дасудовых расследаванняў мытнікі ўжо канфіскавалі 10,4 мільёна пачкаў нелегальных цыгарэт. Летась за ўвесь год было перахоплена 8,3 мільёна пачкаў кантрабанднага тавару.