Антыцыклон прынясе ў Беларусь пятнаццаціградусны мароз

Прагноз надвор'я на 6–8 снежня.

6 снежня ўмовы надвор'я ў Беларусі будзе вызначаць вобласць павышанага атмасфернага ціску, сфармаваная ў халоднай і вільготнай паветранай масе. Воблачна з праясненнямі. У асобных раёнах краіны пройдзе невялікі снег. Месцамі чакаюцца туман і шэрань. На асобных адрэзках дарог галалёдзіца. Вецер усходні сярэдні. Тэмпература паветра мінімальная ноччу -5… -11°С, пры праясненнях паветра будзе ахалоджвацца да -12… -17°С, максімальная днём складзе ад -1°С па паўднёвым захадзе да -10°С па паўночным усходзе Беларусі. Атмасферны ціск істотна не зменіцца.

7–8 снежня тэрыторыя краіны будзе знаходзіцца на перыферыі шырокага халоднага антыцыклону з цэнтрам над паўночным усходам Еўрапейскай тэрыторыі Расеі. Чакаецца воблачнае з праясненнямі надвор'е.

7 снежня пераважна без ападкаў, толькі месцамі па захадзе краіны пройдзе невялікі кароткачасовы снег. На асобных адрэзках дарог галалёдзіца. Вецер паўднёва-ўсходні, усходні сярэдні, днём месцамі парывісты. Тэмпература паветра мінімальная ноччу -7… -13°С, пры праясненнях -14… -16°С, па захадзе краіны яна складзе -3… -6°С; максімальная днём -2… -9°С.

8 снежня месцамі па краіне чакаецца невялікі кароткачасовы снег. На асобных адрэзках дарог галалёдзіца. Вецер паўднёва-ўсходні, усходні сярэдні, днём месцамі парывісты. Тэмпература паветра мінімальная ноччу -6… -12°С, пры праясненнях -13… -16°С, максімальная днём -2… -9°С.