Зяленскі: Сёння толькі адно слова - «малайцы»

Прэзідэнт Украіны павіншаваў абаронцаў краіны з Днём УСУ.

Прэзідэнт Украіны Уладзімір Зяленскі павіншаваў украінцаў з Днём Узброеных сіл Украіны. Відэазварот апублікаваны 6 снежня на яго старонцы ў Instagram. 

Вярхоўны галоўнакамандуючы запісаў віншавальнае відэа, накіроўваючыся пешшу ад Офіса прэзідэнта вуліцай Грушэўскага да Сцяны памяці загінулых абаронцаў Украіны каля Міхайлаўскага Залатаверхага сабора ў Кіеве.

«Дзень смелых. Дзень нязломных. Мужчын і жанчын. Воінаў. Герояў. Усіх, хто працягвае бараніць дзяржаву. І ўсіх, хто аддаў сваё жыццё, каб не аддаць Украіну. І зараз я іду да Сцяны іх памяці», - падкрэсліў ён.

Зяленскі мяркуе, што ля Сцяны памяці неабходна пабываць кожнаму.

«Убачыць аблічча нашых герояў. Зазірнуць ім у вочы. І проста памаўчаць. І ў гэтай цішыні падумаць. Успомніць. Усвядоміць», - сказаў ён.

Прэзідэнт прапанаваў параўнаць раніцу 6 снежня з раніцай 24 лютага 2022 года, 651 дзень таму. Ён нагадаў, што тады многім было страшна, «але страх саступіў».

«Такія імгненні выклікаюць нямала думак, робіш нямала высноў. Памятаеш, што ў нас ззаду, і ведаеш, што ў нас наперадзе», - сказаў Зяленскі ў відэазвароце.

Ён удакладніў, што ззаду ў воінаў Украіны - штодзённая барацьба за часова акупаваныя тэрыторыі, наперадзе - іх вызваленне.

«А як інакш? Гэта нашыя землі, гэта людзі. Няўжо ёсць альтэрнатыва? Не. Ззаду дзевяць гадоў і 651 дзень вайны. Наперадзе - перамога. А як інакш? Няўжо можа быць альтэрнатыва? Усе мы ведаем: не. І на вуліцы крыху холадна, але цёпла на душы. І слізка, але ведаю: дойдзем. Ва ўсіх сэнсах», - падкрэсліў прэзідэнт Украіны.

Ён прызнаў, што Украіне было цяжка, «але мы выстаялі».

«Цяпер няпростая сітуацыя, але мы рухаемся. Як бы ні было складана - дойдзем. Да нашых меж, нашых людзей. Да нашага свету. Свету справядлівага. Свету свабоднага. Насуперак усяму. Разам з вамі. І дзякуючы вам, нашаму народу, нашым Узброеным сілам Украіны», - сказаў Зяленскі.

Віншуючы УСУ са святам, ён заклікаў украінскіх абаронцаў берагчы сябе.

«Сёння толькі адно слова - «малайцы». Толькі адна эмоцыя - падзяка. І толькі адно пажаданне - перамагчы. Камандзіры, калі ласка, беражыце сваіх жаўнераў. Беражыце сябе, будзьце сабой. Я віншую вас з Днём Узброеных сіл Украіны!» - сказаў кіраўнік дзяржавы.

Ён звярнуў увагу, што Дзень УСУ зараз супадае з Днём святога Мікалая.

«І памятаем: да тых, хто паводзіў сябе добра, прыйдзе святы Мікалай Цудатворац. Да тых, хто паводзіў сябе дрэнна, прыйдуць УСУ. Творцы справядлівасці», – сказаў на заканчэнне Зяленскі.