Кіраўнік МЗС Вялікабрытаніі: Рэжым Лукашэнкі – таталітарны

Лондан прадоўжыць выкарыстоўваць санкцыі.

У Палаце лордаў Вялікабрытаніі казалі пра рэпрэсіі ў Беларусі. Кіраўнік МЗС Дэвід Кэмеран (былы брытанскі прэм'ер-міністр) назваў рэжым Аляксандра Лукашэнкі таталітарным.

У Кэмерана спыталі, ці будуць узмацняцца санкцыі супраць рэжыму Лукашэнкі. Ён нагадаў пра ўжо ўведзеныя абмежаванні і пагадзіўся, што патрэбныя новыя крокі.

«Я гляджу на гэта вельмі ўважліва, мы павінны разумець, што гэта таталітарны рэжым Еўропы, - казаў міністр замежных спраў Вялікабрытаніі. - Яны выпадковым чынам канфіскуюць у людзей мабільныя тэлефоны, каб даведацца, з кім яны кантактавалі, за якімі сацыяльнымі сеткамі сочаць. Прафзвязы распушчаныя, а іх лідары пасаджаны ў турму. Размахванне сцягам Украіны - парушэнне закону і можа прывесці да турэмнага зняволення, а 1 500 чалавек з'яўляюцца палітвязнямі. Такім чынам, мы абсалютна згодныя з пастаноўкай пытання і будзем працягваць выкарыстоўваць санкцыі ды іншыя інструменты, калі гэта патрэбна».