У Еўрапарламенце прапануюць скасаваць права вета ў пастановах пра пашырэнне ЕЗ

Каб паставіць на месца Віктара Орбана.

Віцэ-старшыня групы сацыялістаў і дэмакратаў у Еўрапарламенце Педра Маркес мяркуе, што прэм'ер-міністру Вугоршчыны Віктару Орбану нельга дазволіць «шантажаваць» астатніх чальцоў ЕЗ пагрозамі заблакаваць перамовы пра ўваходжанне Украіны.

Словы еўрадэпутата прыводзіць выданне The Guardian, піша «Еўрапейская праўда».

Маркес заявіў, што ЕЗ павінен адмовіцца ад свайго правіла, паводле якога пастановы пра ўваходжанне павінны прымацца аднагалосна.

«Калі вы ўступаеце ў ЕЗ, гэта азначае, што вы з'яўляецеся дэмакратычнай краінай. Думаю, мы не ўяўлялі, што дэмакратыя можа быць карумпаваная знутры», – растлумачыў ён.

Маркес перасцярог ад няздольнасці ЕЗ дамовіцца пра падтрымку Украіны і яе руху ў Еўразвяз.

«У момант калі Кангрэс ЗША толькі што адхіліў прапанову Джо Байдэна прадоўжыць падтрымку Украіны, мы не можам паставіць сябе ў сітуацыю, калі ўкраінцы бачаць, што мы таксама не здольныя прадаўжаць ім дапамагаць.

З майго гледзішча, таксама непрымальна, каб у кагосьці склалася ўражанне, што ў канцы наступнага тыдня Орбан дамогся свайго і атрымаў свае 30 мільярдаў еўраў у абмен на тое, каб ЕЗ прадоўжыў дапамагаць Украіне», – сказаў еўрадэпутат.

Ён падкрэсліў, што ЕЗ «не можа абменьваць грошы на каштоўнасці».

Гэтае папярэджанне прагучала напярэдадні запланаванай сустрэчы прэзідэнта Францыі Эманюэля Макрона з вугорскім прэм'ерам Віктарам Орбанам у Парыжы за вячэрай у чацвер увечары.

Чакаецца, што французскі лідар скажа Орбану, што блакаванне пачатку перамоваў з Украінай падарве стратэгію ЕЗ у барацьбе з Уладзімірам Пуціным.

Орбан пагражае сарваць саміт ЕЗ 14–15 снежня, дакладна даўшы зразумець у двух лістах да прэзідэнта Еўрапейскай рады Шарля Мішэля, што ён выступае супраць перамоваў пра ўваходжанні з Кіевам і замест гэтага хоча правесці стратэгічную дыскусію ў падтрымцы Еўразвязам Украіны.