Шматтысячны мітынг у Варшаве: Беларусы падтрымалі Украіну
17- 24.02.2023, 23:09
- 20,060
Беларусы сёння робяць усё, каб дапамагчы Украіне ў гэтай вайне.
Сёння, у гадавіну вайны ва Украіне, у Варшаве прайшоў шматтысячны мітынг. У ім узялі ўдзел украінцы, палякі і беларусы.
Мітынг пачаўся каля расейскай амбасады ў Варшаве, прадоўжыўся шэсцем, а скончыўся яшчэ адным мітынгам ля Сейма Рэспублікі Польшча.
Перад шматтысячным мітынгам выступалі, выказваючы салідарнасць з Украінай, якая пацярпела ад расейскай ваеннай агрэсіі, вядомыя ўкраінскія і польскія палітыкі, грамадскія дзеячы і журналісты.
Ад імя беларускага народа на мітынгу выступілі галоўная рэдактарка Charter97.org Наталля Радзіна і маці загінулага ва Украіне беларускага добраахвотніка Эдуарда Лобава Марына Лобава.
Наталля Радзіна ў сваім выступе заявіла, што ўвесь беларускі народ сёння разам з Украінай. Ворагам Украіны сёння з'яўляецца рэжым Лукашэнкі, які цалкам падтрымлівае Пуціна ў гэтай злачыннай вайне. У Беларусі кіруе фашысцкая хунта. Краіна, у сутнасці, акупаваная расейскімі войскамі. Тысячы беларусаў сёння знаходзяцца ў турмах, дзе церпяць катаванні і бесчалавечнае абыходжанне.
Але беларусы сёння робяць усё, каб дапамагчы Украіне ў гэтай вайне. У тым ліку коштам уласных жыццяў. Ва Украіне ўжо загінулі блізу 30 беларускіх добраахвотнікаў. Але нашыя мужчыны прадаўжаюць абараняць Украіну, таму што разумеюць, што там сёння вызначаецца і лёс Беларусі, адзначыла Наталля Радзіна.
Марына Лобава расказаў пра свайго сына Эдуарда Лобава, які гераічна загінуў у баі пад Вуглядарам. Жанчына адзначыла, што ганарыцца сваім сынам, які аддаў жыццё за свабоду Украіны і Беларусі.
Марына Лобава заявіла, што рэжымы Пуціна і Лукашэнкі павінны панесці пакаранне за гібель тысячаў і тысячаў людзей ва Украіне.
«Не павінны сёння Расея і дыктатары Пуцін і Лукашэнка распараджацца жыццямі нашых дзяцей!» – сказала маці беларускага ваяра.
На акцыі было шмат беларускіх нацыянальных сцягоў, транспарантаў, плакатаў са словамі салідарнасці з Украінай і з асуджэннем агрэсіі Расеі.