Пад Вуглядарам УСУ знішчылі чатыры танкавыя калоны войскаў РФ

Знішчана блізу 30 адзінак варожай бранятэхнікі.

Расейцы правалілі чарговы «вялікі наступ» у Данецкай вобласці:

Расейскія акупанты здзейснілі серыю спроб прарываў на Вуглядарскім кірунку, аднак пацярпелі татальнае фіяска, страціўшы ва ўкраінскіх палях блізу 30 адзінак браняванай тэхнікі.

Фота знішчанай калоны расейскіх бронемашын на адной з грунтавых дарог пад Вуглядарам, прадстаўленае байцамі 72-й АМБр, апублікавала ўвечары 6 лютага маніторынгавая ініцыятыва DeepState.

«Акупанты спрабуюць ціснуць усімі магчымымі сродкамі, але нашы байцы ператвараюць іх у металалом», - гаворыцца ў паведамленні.

Інфармацыю аб разгроме танкавых калон РФ пацвердзіў украінскі журналіст Андрэй Цапліенка. Свой допіс ён апублікаваў, спасылаючыся на словы аднаго з байцоў 72-й АМБр.

«Учора, 6 лютага, раніцай з Паўлаўкі ў бок Вуглядара выехала цэлых чатыры калоны акупантаў па пяць танкаў у кожным. Таксама варожую пяхоту актыўна падтрымлівалі БМП. Вораг такім чынам паспрабаваў чарговы раз прарваць абарону ўкраінцаў. Толькі за папярэднія дні УСУ змаглі знішчыць адразу 8 адзінак вайсковай тэхнікі ворага.

Учора толькі сіламі аднаго ўкраінскага абаронцы ўдалося знішчыць адразу два варожыя танкі. Яшчэ два ўкраінскія кулямётчыкі падзіравілі дзве варожыя БМП. А вось нашыя мінамётчыкі і АГСнікі знішчылі вельмі шмат варожай пяхоты», - напісаў Цапліенка.

Са слоў журналіста, толькі за ўчорашні дзень быў адбіты наступ адразу шасці варожых калон. Супраціўнік пакінуў на полі бою блізу 30 адзінак вайсковай тэхнікі.

Адзначым, разбітая вайсковая тэхніка ворага каля Вуглядара - вынік майстэрскай працы ўкраінскіх абаронцаў з 72-й асобнай механізаванай брыгады імя Чорных Запарожцаў. Гэта вайсковае фармаванне механізаваных войскаў Узброеных сіл Украіны, якое ў мірны час дыслакуецца ў горадзе Белая Царква Кіеўскай вобласці і носіць ганаровую назву ў гонар Чорных запарожцаў - слаўных ваяроў часоў УНР.