У Бахмуце УСУ стукнулі па «вагнераўцах» тэрмабарычным набоем

Выбух нагадвае міні-«Сонцапёк».

У сеціве апублікавалі відэа выкарыстання байцамі УСУ тэрмабарычных боепрыпасаў для гранатамёта. Эфект ад выбуху боепрыпасаў падобны да ТГС «Сонцапёк». Месца выкарыстання - наваколлі Бахмута, якія жорстка штурмуюцца «вагнераўцамі».

Інфармацыя апублікаваная ў Telegram-канале Ігаля Левіна, ізраільскага ваеннага экспэрта.

Відэа зафіксавала працу 241-й брыгады тэрытарыяльнай абароны УСУ. Байцы занялі пазіцыю каля аднапавярховага дома на ўскраіне Бахмута. За некалькі сотняў метраў наперадзе - падраздзяленне «вагнераўцаў», якіх расійскае камандаванне кінула на захоп горада ў Данецкай вобласці.

На першых кадрах відаць, як баец цэліцца ў бок акупантаў. Побач - пабрацімы чакаюць сваёй чаргі.

Праз імгненне адбываецца стрэл. На месцы ўдару з'яўляецца ўспышка, падобная да ўдару тэрмабарычнага набою «Сонцапёка».

У паведамленні паказана, што ўдар нанесены боепрыпасам RTB-7A - набоем, які выпускаюць у Балгарыі.

Адзначым, што выбух RTB-7A суправаджаецца магутнай ударнай хваляй і звышвысокай тэмпературай – да 1 000 градусаў Цэльсія. Украінскія вайскоўцы цэліліся ў пэўны аб'ект, які павінен быў знаходзіцца за 500-1000 метраў наперадзе - ёсць надзея, што яны ў яго патрапілі.

Боепрыпасы RTB-7A выпускаюцца найстарэйшым вытворцам зброі ў Балгарыі - кампаніяй Arsenal.