Прапагандыстка Сіманьян заявіла аб гатоўнасці памерці

На яе думку, пайсці з жыцця на 30 гадоў раней - неістотная дробязь.

Крамлёўская прапагандыстка Маргарыта Сіманьян ухвальна адгукнулася аб смерцях грамадзян РФ на вайне супраць Украіны. Яна заявіла, што смерць для расейцаў непазбежная, таму лепш памерці «за правільную і важную» справу, чым ад хваробы.

Пра гэта Сіманьян заявіла ў эфіры праграмы «Жыццё і лёс» Барыса Карчэўнікава на прапагандысцкім канале «Расія-1». На яе думку, памерці нават на 30 гадоў раней - не страшна, асабліва з пункту гледжання Сусвету.

«Смерць непазбежная, смерць чакае ўсіх нас. І зусім не факт, што лепш памерці нямоглым чалавекам ад якой-небудзь цяжкай, доўгай і жахлівай хваробы, чым вось так, яшчэ і за правільную і важную справу», – заявіла расейская прапагандыстка.

Яна дадала, што паміраць было б крыўдна, калі б смерці можна было пазбегнуць, але шанцаў на гэта няма.

«Розніца ў 10, 20, 30 гадоў - у прынцыпе невялікая. З пункту гледжання Сусвету - наогул невялікая. Я, дзякуй Богу, трох дзяцей ужо нарадзіла, чагосьці, чаго хацела, у жыцці дамаглася, дасць Гасподзь яшчэ паспаборнічаць, абараняць сваю краіну, я буду ўдзячная і радая», - заявіла Сіманьян.