Актывіст працоўнага руху трымае галадоўку ўжо 41 дзень

Аляксандр Капшуль распачаў пратэст 31 снежня.

У Гомельскім абласным судзе з 9 лістапада ў закрытым рэжыме праходзіць суд паводле справы актывістаў працоўнага руху. Паводле справы праходзяць адразу дзесяць палітвязняў, сярод якіх – Аляксандр Капшуль.

Усіх абвінавачваюць у здрадзе дзяржаве, а таксама паводле шэрагу іншых артыкулаў Крымінальнага кодэкса. Палітвязням пагражае да 15 гадоў зняволення.

Як паведамляюць праваабаронцы, з 31 снежня Аляксандр абвясціў галадоўку супраць парушэння заканадаўства падчас ягонага ўтрымання ў гомельскім СІЗА. Галадоўка прадаўжаецца 41 дзень, пры гэтым першыя некалькі дзён ён не піў нават вады.

Капшуля затрымалі 25 верасня 2021 года на тэрыторыі РФ і перадалі супрацоўнікам КДБ Беларусі. Паведамлялася, што ў яго была зламаная нага і пашкоджаная рука.