«Збіраю капейчыны і потым купляю свае мары»
1- 20.03.2023, 11:15
- 4,438
![«Збіраю капейчыны і потым купляю свае мары»](https://i.c97.org/p/articles/2016/ai-230731-aux-head-20161111_magaz_t.jpg)
Беларусы расказалі аб магчымасцях нармальна закупіцца ў рэгіёнах.
На месцы будаўнічага гіпермаркета ОМА ў Жодзіне адкрыюць сямейны Kari. Гэта недарагі абутак, цацкі і аксэсуары. EX-PRESS.BY спытаў у чытачоў, якіх крамаў не стае ў Жодзіне і за чым даводзіцца ездзіць у сталіцу ці іншыя гарады/краіны?
Вольга:
- Я вельмі сціпла жыву, збіраю капеечкі і потым купляю свае мары. І, дарэчы, у Менску купляю і адзенне, і ежу. Можа, гэта звычка такая, але ёсць месцы ў Менску, дзе рэальна танней адзявацца і харчавацца. Зрэшты, у Менск езджу не адмыслова, а ў працы. А ў Жодзіна, мне здаецца, патрэбная ўсё ж нармальная бюджэтная будаўнічая крама. Праўда, у ОМА я хадзіла больш на «экскурсіі», але я бачыла, што людзі там рабілі пакупкі. Дзе яны зараз закупляюцца, я не ведаю.
Ігар:
- Не хочацца нічога купляць. Быццам і трэба было б, але няма настрою. Збіраю грошы на выпадак, калі давядзецца ўцякаць з гэтага няшчаснага Жодзіна і ўжо да мяжы змучанай Беларусі.
Фёдар:
- Усе крамы ёсць у Жодзіне, і рынак таксама нармальны. Людзі імкнуцца выжыць у крызіс. Калі не маеш асаблівых прэтэнзій, не марыш пра гламур, то ў Жодзіне ўсё можна набыць.
Алена:
- Не месцы ежы і адзення патрэбны нам, іх поўна і так. Лепш бы школу пабудавалі ў Восьмым мікрараёне... Зрэшты, гандлёвыя цэнтры будуюць і адчыняюць фундатары і прадпрымальнікі, а не гарадскія ўлады.
Наталля:
- Быццам ёсць усё, але нармальнае брэндавае адзенне можна знайсці толькі ў сэкандах. Гэта калі пашанцуе. Крамы ў Жодзіне - асобная песня.
А наогул мне сорамна ў нашым горадзе за ўбогую аўтастанцыю... Для іншагародніх шок: першае, што яны бачаць - металічны вагончык. Так бы мовіць, твар горада. Але гэта сапраўды не клопат фундатараў.
Яўгенія:
- Я езджу ў Польшчу і апранаюся, і, па магчымасці, прыводжу сякія-такія прадукты адтуль. Ад'ядаюся тамака смачным і, вядома, купляю тамака джынсы-майкі-курткі і абутак. У гэтым годзе была двойчы. Дарэчы, ніякая прадукцыя з Беларусі не здаецца мне цяпер смачнейшай ці цікавейшай. І малочная, і цукеркі, і каўбасы ў Польшчы вельмі смачныя і таннейшыя, чым у Беларусі.