На будынку гарадскога ўрада польскага Элка да Дня Волі вывесілі беларускі сцяг

Напярэдадні дыяспара напісала ліст прэзідэнту горада.

24 сакавіка ў польскім горадзе Элку, што ў Паўночным Вармінска-Мазурскім ваяводстве, мясцовыя ўлады з нагоды Дня Волі вывесілі беларускі нацыянальны бел-чырвона-белы сцяг у знак салідарнасці з беларусамі, піша «Белсат».

«Цяпер у Беларусі шмат людзей у турмах паводле палітычных абвінавачванняў. У выніку рэпрэсій грамадзянская супольнасць знішчаецца, а беларусы вымушаныя пакідаць радзіму. У нашым горадзе таксама пражываюць беларускія сем'і, якія ў пошуках бяспекі эмігравалі ў нашу краіну», - гаворыцца ў звароце, апублікаваным на сайце мясцовага кіроўнага органа.

Бел-чырвона-белы сцяг у знак салідарнасці з беларускімі дэмакратычнымі сіламі быў вывешаны на будынку мэрыі Элка.

Таксама на лічбавых экранах гарадской ратушы адлюстроўваецца графіка ў колерах гістарычнага флага Беларусі і надпіс аб салідарнасці з беларускім народам.

Сцяг у Элку вывесілі на просьбу мясцовых беларусаў, якія звярнуліся з адпаведнай прапановай на электронны адрас прэзідэнта горада Тамаша Андрукевіча.

«Мы проста напісалі ліст, і праз некалькі дзён нам даслалі адказ з прапановай патэлефанаваць на нумар і ўзгадніць візіт да прэзідэнта горада. І ўжо на самой сустрэчы Томаш Андрукевіч распавёў, што сцяг праз салідарнасць з беларусамі будзе вывешаны», - распавялі беларусы Элка ў каментары «Белсату».

Бел-чырвона-белыя сцягі ў знак салідарнасці з беларусамі ўжо вывешвалі ў Элку ў верасні 2020 года.