Афіцыйна: пасольства Ізраіля ў Беларусі прыпыніла працу праз усеагульны страйк

Ізраільцяне пратэстуюць супраць судовай рэформы.

Амбасада Дзяржавы Ізраіль у Рэспубліцы Беларусь часова прыпыніла працу праз агульнанацыянальную забастоўку. Пра гэта паведамляе ізраільская дыпламатычная місія на сваёй старонцы ў Facebook.

«З прычыны ўсеагульнай забастоўкі, абвешчанай Гістадрутам - Усеагульнай федэрацыяй працоўных Ізраіля, якая распаўсюджваецца на ўрадавыя ўстановы, уключаючы дыпламатычныя місіі за мяжой, Амбасада будзе закрытая і консульскія паслугі надавацца не будуць», - гаворыцца ў паведамленні.

Аб заканчэнні забастоўкі будзе абвешчана дадаткова, удакладнілі ў дыпмісіі.

У Ізраілі з пачатку 2023 года праходзяць масавыя акцыі пратэсту ў сувязі з планамі ўрада правесці судовую рэформу. Яна абмяжоўвае паўнамоцтвы Вярхоўнага суда і дазволіць парламентарыям аспрэчваць яго пастановы, а таксама дае Кабінету міністраў кантроль над працэдурай прызначэння суддзяў.

У панядзелак, 27 сакавіка, ізраільскі прафзвяз Гістадрут абвясціў усеагульную забастоўку ў знак пратэсту супраць судовай рэформы. Да забастоўкі далучыліся работнікі аховы здароўя, дзіцячых устаноў, а таксама чыноўнікі і некаторыя супрацоўнікі розных падраздзяленняў Мінюста Ізраіля. Прыпыненне працы таксама пацвердзілі на сваіх старонках у сацсетках пасольства Ізраіля ў ЗША і Францыі.