16 лiпеня 2024, aўторак, 4:04
Падтрымайце
сайт
Сім сім,
Хартыя 97!
Рубрыкі

Украінскі генерал: Захад праз Шайгу перадаў у Крэмль сігнал

7
Украінскі генерал: Захад праз Шайгу перадаў у Крэмль сігнал

Хаўруснікі будуць падтрымліваць Украіну да пераможнага канца.

Цяпер усе сродкі Захаду для дапамогі Украіне і супрацьдзеянню пуцінскай агрэсіі актывізаваныя. Падчас новага этапу контрнаступу будзе ўжытая найноўшая тэхніка і ўзбраенні, у тым ліку танкавы кулак, які дае магчымасць браць у атачэнне групоўкі ворага. Такое меркаванне ў эксклюзіўным інтэрв'ю "Обозревателю" выказаў кіраўнік Службы замежнай выведкі Украіны ў 2005-2010 гадах, генерал арміі Мікалай Маламуж.

- Прэзідэнт дзяржавы-агрэсара Расеі Уладзімір Пуцін зноў загаварыў аб «чырвоных лініях», якія нібыта перайшоў Захад, даючы зброю Украіне. Ён таксама заявіў аб тым, што мерыцца размясціць тактычнае ядзернае ўзбраенне на тэрыторыі Беларусі ў адказ на пастаўкі ва Украіну танкаў Challenger 2. Паводле вашых ацэнак, як Пуцін можа выкарыстоўваць тэрыторыю Беларусі, улічваючы ўсе гэтыя пагрозы?

- Найперш неабходна разгледзець прычыны, чаму ён зноў перайшоў да рыторыкі размяшчэння ядзернай зброі на тэрыторыі Беларусі. Гэта звязана з тым, што ў яго вельмі вялікія праблемы на фронце. Ён не рэалізаваў ніводную задачу сваёй «спецаперацыі». Ён нават не змог захапіць Бахмут і ўсю Данецкую і Луганскую вобласць. Яго войска нясе вельмі вялікія страты. У Пуціна няма добрых пэрспэктыў для наступальных аперацый нідзе, нягледзячы на тое, што ён спрабуе дэманстраваць атакі на Аўдзееўку, Бахмут і іншыя населеныя пункты.

Пуцін ускладаў надзеі на тое, што ягоны ціск на Захад будзе эфектыўным, што Сі Цзіньпін уступіць у гульню. Але кіраўнік Кітая вельмі спрытна адышоў ад сітуацыі і адмовіўся ад вайсковага звязу з Расеяй. Гэта было вялікім ударам для Пуціна. Акрамя таго, была пастанова Міжнароднага крымінальнага суда ў Гаазе, што стала яшчэ адным магутным ударам па амбіцыях Пуціна.

Перспектыў у яго няма. Ва Украіну ідуць новыя караваны вайсковай дапамогі. Гэта ўзбраенне і тэхніка высокага класа, ракетныя сістэмы, танкі, БТР, самалёты, сістэмы супрацьпаветранай абароны, вельмі вялікая колькасць боепрыпасаў розных тыпаў, у тым ліку ракеты далёкага дзеяння. А гэта далягляд нашых перамог на фронце.

Апошні аргумент, які застаўся ў Пуціна - гэта, вядома, ядзерная зброя. Але ён папярэджаны і ЗША, і Вялікабрытаніяй, і Кітаем аб недапушчальнасці такога сцэнару. Але зараз Пуцін звяртаецца да іншага тыпу шантажу - ён заяўляе аб тым, што нібыта даўно планаваў размясціць у Беларусі тактычную ядзерную зброю, апраўдваючы гэта тым, што нібыта гэта ўзгоднена з Лукашэнкам. Адначасова ён імкнецца фармальна не парушаць дамову аб нераспаўсюджанні ядзернага ўзбраення, размяшчаючы яе на расейскіх вайсковых базах у Беларусі. Такім чынам, ён нібыта не перадае ядзерных сродкаў трэцяй краіне. Але фактычна Пуцін парушае ўсе нормы, бо ўцягвае Беларусь у ядзернае супрацьстаянне.

Такімі дзеяннямі Пуцін фактычна прад'яўляе Захаду ультыматум: маўляў, вы спыняеце пастаўкі ўзбраенняў ва Украіну, я не размяшчаю ядзерную зброю ў Беларусі. Так ён разлічвае атрымаць, як мінімум, перадых, паўзу ў ваенных дзеяннях.

Але Захад ужо не ўспрымае ўсе пагрозы і шантаж Пуціна. Ён выклікае не толькі занепакоенасць, але і контрдзеянні. За дзеяннямі Пуціна вельмі пільна сочаць. У ЗША заяўляюць, што кантралююць усе ядзерныя рэсурсы Расеі па ўсіх сектарах - як тактычныя носьбіты, так і стратэгічныя ў розных мясцінах шахтнага тыпу, на перасоўных носьбітах, марскога базавання. Свой голас адносна недапушчэння ядзернай катастрофы ўзняў і Кітай.

Таму думаю, у адказ на шантаж Пуціна рушаць больш інтэнсіўныя неафіцыйныя перамовы. Праз Шайгу Пуціну перадаюцца пасланні аб тым, што ў выпадку разгортвання ядзернага ўзбраення будзе наймагутнейшы ўдар па ядзерных сродках Расеі.

- Паводле інфармацыі Дзяржаўнай памежнай службы Украіны, крыху больш за 4 тысяч салдат акупацыйнай войска былі перакінуты ва Украіну з тэрыторыі Беларусі. На вашую думку, ці можа Пуцін выкарыстоўваць патэнцыял асабовага складу, які ён мае там, каб арганізаваць новую наступальную аперацыю з поўначы нашай краіны?

- Нашы памежнікі фіксуюць змяншэнне колькасці кантынгенту расейскіх вайскоўцаў, якія знаходзяцца на тэрыторыі Беларусі, з 9 да 4 тысяч. Блізу 5 тысяч ужо было перакінута на тэрыторыю Украіны. Расея праводзіць у Беларусі падрыхтоўку мабілізаваных расейцаў на працягу 1-2 месяцаў, потым іх накіроўваюць на фронт. Фактычна гэта канвеер.

- Паводле інфармацыі выдання TheGuardian, украінскія экіпажы, якія праходзілі навучанне ў Вялікабрытаніі на танках Challenger 2, вярнуліся ва Украіну. З прагнозаў, гэтыя танкі будуць выкарыстаныя падчас магутнага контрнаступу нашага войска. Наколькі танкавая кампанента будзе важная ў будучым контрнаступе?

- Я думаю, неабходна разглядаць комплекснае выкарыстанне ўсіх узбраенняў. Самі па сабе танкі нічога не вызначаюць. Магутныя кулакі - танкавыя, бранятанкавыя - гэта, вядома, комплекс усіх сродкаў. І танкі, якія мы атрымліваем ад Захаду, і нашыя танкі.

Вядома ж, заходнія танкі і тэхналагічна, і ў баявой моцы істотна пераўзыходзяць усе расейскія танкі, у тым ліку Т-90, якія ўжо зараз гараць на полі бою. Яны маюць далёкасць паразы да 6 кіламетраў і вельмі манеўраныя. Таму танкавая кампанента з'яўляецца вельмі магутнай для вядзення наступальных аперацый.

Разам з гэтым у контрнаступе будуць задзейнічаны каля 250-300 БТР і БМП, якія таксама могуць знішчаць варожыя танкі, а таксама іншую браняваную тэхніку. Вядома ж, гэта яшчэ і дальнабойныя ракеты, якія будуць знішчаць рэзервы ворага ў тыле, тыя ж танкі, якія, хутчэй за ўсё, будуць ехаць на платформах.

Танкі - гэта тыя сілы, якія будуць дзейнічаць як ударныя сілы па стратэгічных кірунках або праводзіць вельмі хуткую аблогу войскаў супраціўніка. Гэта можа выклікаць паніку ў табары ворага і яго ўцёкі з поля бою. Гэты вельмі эфектыўны сродак, але толькі ў злучэнні з іншымі сродкамі, у першую чаргу, ракетнымі, а таксама з нашымі ўдарнымі брыгадамі.

- Паводле аналітыкі Інстытута вывучэння вайны (ISW), Пуцін па-ранейшаму разлічвае на перамогу ў гэтай вайне за кошт двух складнікаў: навязваючы ўкраінцам сваю волю сілай або зламаўшы яе пасля таго, як «Захад пакіне Кіеў». Ці дапускаеце вы, што заходняя ваенная дапамога Украіне сапраўды можа спыніцца? Ці думаеце вы, што ў Крамля ёсць тэарэтычныя шанцы на поспех?

- Інстытут вывучэння вайны разглядаў і трэці сцэнар - спынення дапамогі на пэўным этапе з захаваннем статус-кво, на нейкім больш выгадным для Украіны этапе, але не на этапе канчатковай перамогі.

Але ў гэтай сітуацыі я думаю, што ў Захаду фактычна няма выбару. Аб'яднаны ўсе намаганні партнёраў Украіны. Агрэсіўны рэжым у Расеі пагражае ўжо не толькі нашай краіне, але і Еўропе, краінам NАТО. Улічваючы ядзерны шантаж, ён нясе пагрозу і для ўсяго свету.

Гіпатэтычная перамога Пуціна ва Украіне пагражае Польшчы і іншым краінам. Менавіта таму нашу краіну падтрымліваюць вельмі актыўна, каб украінскае войска перамагло на полі бою. Адначасова Захад будзе аб'ядноўваць усе палітычныя намаганні, каб паставіць Пуціна на месца, каб ягоны рэжым альбо канчаткова загінуў, альбо каб ён цалкам вызваліў тэрыторыю Украіны.

Яго апошняя ядзерная рыторыка яшчэ больш з'яднала Захад. Эліты на Захадзе настроеныя на тое, што агрэсар павінен адказваць. Адсюль і запэўненне Украіны ў тым, што дапамога будзе працягвацца столькі, колькі гэта неабходна. І павелічэнне вытворчасцяў, і павелічэнне закупак, найперш боепрыпасаў, і будаўніцтва новых заводаў - усё гэта сведчыць аб тым, што Захад разлічвае на доўгатэрміновую перспектыву.

Цяпер усе сродкі актывізаваныя. Пуцін сам выклікаў агонь на сябе. Ён хацеў паставіць умовы NАТО, Еўропе, а ўсё выйшла наадварот. Наступствы для яго будуць вельмі сур'ёзныя. Перспектыў для Пуціна няма.

Напісаць каментар 7

Таксама сачыце за акаўнтамі Charter97.org у сацыяльных сетках