«Гэта такая колькасць баявых прыпасаў, якая можа пераламаць хаду вайны»

Экс-міністр абароны Балгарыі расказаў аб сюрпрызе для Украіны.

Балгарыя праз пасярэднікаў можа перадаць Украіне старыя баявыя прыпасы на €175 млн. Такая колькасць здольная змяніць хаду падзей на фронце.

Пра гэта заявіў былы міністр абароны Балгарыі Бойка Ноеў, паведамляе Euractiv.

У міністэрстве абароны Балгарыі паведамілі, што перададуць старыя баявыя прыпасы коштам амаль 175 мільёнаў еўраў дзяржаўнаму вайсковаму заводу ВМЗ, а атрымаюць новыя баявыя прыпасы. Паводле слоў экс-міністра абароны краіны, мэта такога варыянту ў тым, каб найбольшая колькасць баявых прыпасаў трапіла са складоў балгарскага войска ва Украіну.

«Гэта найвялікшае пераўзбраенне балгарскіх наземных войскаў у найноўшай гісторыі. Гэтая вялізная колькасць баявых прыпасаў - сотні тысяч. Адбываецца велізарны рост цаны баявых прыпасаў, і ВМЗ будзе прадаваць гэтыя баявыя прыпасы праз пасярэднікаў ва Украіну», - адзначыў былы міністр.

Са слоў Ноева, балгарскае войска мае дастатковую колькасць зброі савецкага ўзору, у якой мае патрэбу Украіна. Гэта зменіць хаду падзей на фронце.

"Гэта такая колькасць баявых прыпасаў, якая можа пераламаць хаду вайны ў пэўных кірунках на ўкраінскім фронце", - дадаў ён.