Крэмль прысвоіў грыф сакрэтна для траціны расейскага бюджэту

Сыравінныя даходы РФ імкліва падаюць, а марнаванні рэкордна растуць.

Федэральны бюджэт Расеі хаваецца ў тумане дзяржаўнай таямніцы па меры таго, як сыравінныя даходы імкліва падаюць, а выдаткі на вайну і сілавыя структуры рэкордна растуць.

На 21 сакавіка ўрад РФ выдаткаваў па сакрэтных і не ўдакладненых артыкулах 2,4 трыльёна рублёў, або $31 млрд, паведамляе Finanz са спасылкай на Bloomberg і аператыўную статыстыку Мінфіна РФ.

У параўнанні з тым жа перыядам мінулага года сакрэтныя асігнаванні падскочылі амаль на 130% і ўпершыню сталі найбуйнейшым артыкулам выдаткаў казны.

Для параўнання: на «сацыяльную палітыку», у тым ліку пенсіі і выплаты на дзяцей, Мінфінансаў выдаткавала 1,551 трлн рублёў. На падтрымку нацыянальнай эканомікі - 567 млрд рублёў. На ахову здароўя і адукацыю - па 250 млрд рублёў, гэта значыць, амаль у 10 разоў менш, чым па «сакрэтных» і не ўдакладненых артыкулах.

Хоць за першыя два месяцы 2023 года нафтагазавыя даходы бюджэту аселі на 46%, а несыравінныя паступленні - на 9%, урад марнуе так, нібыта праблем са зборам падаткаў няма. «Усплёск выдаткаў звязаны з закупамі ўзбраенняў, выплатамі мабілізаваным і спробай скончыць знакавыя інфраструктурныя праекты да заканчэння цяперашняга тэрміну прэзідэнта», – кажа эканаміст што да Расеі Bloomberg Economics Аляксандр Ісакаў.

Пры тым, што агульныя выдаткі бюджэту да сярэдзіны сакавіка перавысілі 7 трыльёнаў рублёў, доля «сакрэтных» дасягнула блізу траціны, пабіўшы рэкорд 2015 года, калі «таямніцай» быў кожны пяты змарнаваны ўрадам рубель.