Расейскага афіцэра адправілі пад суд за няўдачы СПА ў Белгарадскай вобласці

Гэта першы выпадак у гісторыі вайны.

Супраць расейскага афіцэра ўпершыню ў сучаснай гісторыі распачалі крымінальную справу за тое, што ён не прадухіліў «напад з боку Украіны», піша «Коммерсант» са спасылкай на блізкія да расследавання крыніцы.

З іх звестак, справу паводле часткі 2 артыкула 340 КК (парушэнне баявога дзяжурства, якое прывяло да цяжкіх наступстваў; да дзесяці гадоў пазбаўлення волі), завялі вясной мінулага года пасля ракетнага абстрэлу Белгародскай вобласці, ажыццёўленага Узброенымі сіламі Украіны.

Паводле версіі следства, афіцэр, які знаходзіўся на баявым дзяжурстве, не прадухіліў напад УСУ, у выніку чаго загінулі сем чалавек, а 43 атрымалі раненні і кантузіі. Таксама было знішчана 15 адзінак тэхнікі і яшчэ 30 - пашкоджана. Агульная шкода толькі ад страты тэхнікі склала 89 млн руб.

Следчыя 1-га аддзела вайсковай следчай управы СК у Заходняй акрузе палічылі, што напад стаў магчымым з-за недастатковага прыкрыцця паветранай прасторы ў памежнай зоне сродкамі СПА. Пры гэтым у афіцэра былі «ўсе магчымасці для прадухілення атакі УСУ».

Следства мяркуе, што фігурант крымінальнай справы не толькі памыліўся асабіста, але і дапусціў сур'ёзныя пралікі ў арганізацыі баявой службы даручанага яму падраздзялення, гавораць крыніцы. У сувязі з гэтым у выстаўленым яму абвінавачанні акрамя арт. 340 КК РФ ёсць яшчэ і ч. 3 арт. 286 КК РФ, якая прадугледжвае адказнасць за перавышэнне службовых паўнамоцтваў і таксама мяркуе да 10 гадоў пазбаўлення волі.

Абвінавачаны з траўня 2022 года знаходзіцца пад вартай. Меру стрымання яму абіраў і падаўжаў гарнізонны ваенны суд у Курску, да юрысдыкцыі якога адносяцца ваенныя часці ў Белгарадскай вобласці. Са снежня мінулага года абвінавачаны знаходзіцца ў СІЗА Санкт-Пецярбурга.

Афіцэр не прызнае віну і рэгулярна абскарджвае абраную меру стрымання ў 1-м і 2-м Заходніх акруговых ваенных судах.

Раней стала вядома, што Вярхоўны суд Расеі рыхтуе рэкамендацыі судам аб злачынствах, учыненых супраць ваеннай службы, у тым ліку і паводле артыкула 340 КК. У праекце пастановы пленума ВС гаворыцца, што цяжкімі наступствамі варта лічыць, сярод іншага, гібель людзей, ускрыццё сістэмы СПА і сам факт непрадухілення нападу.