УСУ вярнулі пазіцыі вакол Бахмута

Вынікі баёў за горад паказалі на новых мапах.

Украінскія войскі аднавілі пазіцыі вакол Бахмута Данецкай вобласці. Пра гэта ў аператыўным аналізе 31 сакавіка піша амерыканскі Інстытут даследавання вайны (ISW).

Камандаванне Узброеных сілаў Украіны прадаўжае падкрэсліваць важнасць далейшай абароны ў гэтым раёне, адзначаюць у інстытуце. Здымка на мясцовасці паказвае, што ўкраінскія войскі правялі контратаку на паўднёвы захад ад Бахмута і вярнулі страчаныя пазіцыі на поўдзень ад Іваніўскага (прыкладна за 7 км на паўднёвы захад ад горада), гаворыцца ў паведамленні.

«Намесніца міністра абароны Украіны Ганна Маляр заявіла 31 сакавіка, што самаадданая абарона Бахмута Украінай зрабіла яе самым дарагім “праектам” Расеі ў вайне, і адзначыла, што час, узбраенне, тэхніка і вялізная колькасць ахвяраў, адданых ворагам на ўзяцце Бахмута, не апраўдваюць сябе з гледзішча ваеннай мэтазгоднасці. Заява Маляр пацвярджае ацэнку ISW, што ўкраінская абарона Бахмута застаецца стратэгічна абгрунтаванай да таго часу, пакуль УСУ знясільваюць жывую сілу і тэхніку ворага», – напісана ў справаздачы ISW.

У той самы час, паводле звестак вайсковых экспертаў, 31 сакавіка акупанты прадоўжылі спробы наступу ў горадзе і наваколлях. Кадры з геалакацыяй паказваюць сцяг групы ПВК «Вагнер» у будынку ў цэнтры Бахмута ў межах некалькіх кварталаў ад будынка гарадской адміністрацыі. Расейскія «ваенкары» сцвярджалі, што «Вагнер» наступае на поўначы і поўдні горада.

Таксама адзін з вядомых ваенных блогераў адзначыў, што «Вагнер» не можа дамагчыся значнага прагрэсу ў Бахмуце і што ўсе атакі ў горадзе і вакол яго беспаспяховыя. Уладальнік ПВК Яўген Прыгожын заявіў, што няма ніякіх прыкметаў таго, што ўкраінскія войскі пакідаюць Бахмут, дадаюць аналітыкі ISW.

31 сакавіка Маляр, кажучы пра кошт баёў за Бахмут для РФ, заявіла, што Масква «падняла стаўкі на шкоду сабе».

«Вораг не пакідае свае планы і пайшоў на прынцып, падняў стаўкі на шкоду сабе. Гэта вельмі “па-расейску”, логікай не зразумець», – напісала яна ў Telegram.