Жыхарка Быхава збіла міліцыянта

Міліцыянт выявіўся бяссільным у бойцы з жанчынай.

Суд Быхаўскага раёна разгледзеў крымінальную справу ў дачыненні да мясцовай жыхаркі, якую абвінавачвалі ў ілжывым паведамленні аб мінаванні і ў нападзе на супрацоўніка міліцыі, паведамляе прэс-служба Генпракуратуры.

Паводле матэрыялаў справы, 22 снежня 2022 года жанчына, будучы нецвярозай, патэлефанавала на «101» са свайго мабільнага і перадала ілжывую інфармацыю аб выбуху, які рыхтуецца. У той жа дзень міліцыянты ўстанавілі асобу, якая тэлефанавала, і выклікалі яе ў раённы аддзел для разбору.

У фае аддзялення міліцыі жанчына, п'яная, ударыла нагой памочніка дзяжурнага, які быў у форме і выконваў свае абавязкі, чым «прычыніла пабоі і фізічны боль».

На судзе жыхарка Быхава прызнала сваю віну і папрасіла ў міліцыянта прабачэння.

Суд пастанавіў прызнаць жанчыну вінаватай паводле двух артыкулаў - ілжывае паведамленне аб небяспецы і гвалт у дачыненні да супрацоўніка органаў унутраных спраў. Па сукупнасці злачынстваў ёй прызначылі 1 год і 2 месяцы пазбаўлення волі ў калоніі агульнага рэжыму. Акрамя таго, тэлефон жанчыны канфіскаваны ў даход дзяржавы як сродак учынення злачынства.