Партызаны ўзарвалі чыгуначныя рэйкі пад Луганскам

Забеспячэнне расейскіх войск абцяжаранае.

У Луганскай вобласці на землях, якія знаходзяцца пад расейскай акупацыяй, украінскія партызаны праводзяць мэтанакіраваныя падрывы чыгуначных рэек, а таксама распаўсюджваюць агітацыйныя матэрыялы, паведаміў кіраўнік Паўночнаданецкай раённай вайсковай адміністрацыі Раман Уласенка.

«Партызанскі рух у Луганскай вобласці ёсць. Не такі актыўны, як бы нам хацелася, але былі выпадкі падрыву чыгуначных рэек, ёсць таксама распаўсюджванне агітацыйных матэрыялаў, тролінг акупацыйных уладаў і расейскіх вайскоўцаў надпісамі і сцягамі, і, галоўнае, гэта інфармаванне УСУ аб перамяшчэнні і месцазнаходжанні падраздзяленняў, вайсковай тэхнікі, складоў акупацыйнага войска», - паведаміў Уласенка.

Акрамя таго, кіраўнік раённай адміністрацыі расказаў аб тым, што на Данбасе расейскія акупанты працягваюць адпраўляць мясцовых мужчын наборнага ўзросту на фронт. І гэта робіцца далёка не заўсёды ў добраахвотным парадку.